Оробуочай көрсүһүүгэ сүрүннээн бүддьүөт үлэһиттэрин өйүүр ньымалар, хамнаһы үрдэтии, үлэлииргэ сөптөөх усулуобуйаны мэктиэлиир сокуоннар тустарынан кэпсэттилэр. Сис кэмитиэт бэрэссэдээтэллэрэ Юрий Николаев, Владимир Чичигинаров, Феодосия Габышева кыттыыны ыллылар
“РФ Бэрэсидьиэнэ Владимир Путин судаарыстыба сүрүн соруга дьон олоҕун таһымын үрдэтии, дохуоттарын улаатыннарыы буоларын бигэргэппитэ. Бу ирдэбил идэлээх сойуустары кытта быһаччы ситимнээх”, -- диэн тылларынан спикер: кэпсэтиини саҕалаата.
“Кэнники сылларга инфляция күүскэ бара турар, сыана үүнэ-тэһиинэ суох үрдүүр. Ону учуоттаан, 2022 сыл тохсунньу 1 күнүттэн “майскай” ыйаахха хапсыбатах бүддьүөт сорох үлэһиттэрин хамнастарын үрдэтэргэ туруорсабыт. Кинилэр хамнастара 2018, 2019 сылларга 4% уонна быйыл 3% улаатта. 2020 сыллаахха индексация барбатаҕа. Эһиил 3,6% улаатар диэн, ити олус кыра. Аны туран, «Об основах охраны здоровья граждан в Российской Федерации» диэн федеральнай сокуону толорор туһуттан эмтиир уонна эмтиэкэ эйгэлэрин үлэһиттэрин өйүүр правовой аахтаны ылыныахпытын наада. Маны таһынан «О гарантиях и компенсациях для лиц, работающих в государственных органах Республики Саха (Якутия), Территориальном фонде обязательного медицинского страхования Республики Саха (Якутия), государственных учреждениях, расположенных на территории Республики Саха (Якутия)» диэн эрэгийиэннээҕи сокуоҥҥа үлэһит дьиэ кэргэнин үлэлээбэт чилиэннэригэр айаннарын төлөбүрүн, үлэһит уоппускатын кэмиттэн тутулуга суох, төлүүр туһунан этиини киллэрээри гынабыт. “О внесении изменения в статью 1 Закона Республики Саха (Якутия) «О ветеранах труда Республики Саха (Якутия)» диэн сокуоҥҥа үлэ бэтэрээннэрэ, ханна олороллоруттан тутулуга суох, ый аайы харчынан төлөбүрү ылыахтаахтарын туһунан көннөрүүнү өйүүргүтүгэр көрдөһөбүт”, -- диэтэ СӨ Идэлээх сойуустарын федерациятын бэрэссэдээтэлэ Николай Дегтярев.
Култуура үлэһиттэрин өрөспүүбүлүкэтээҕи идэлээх сойуустарын бэрэссэдээтэлэ Анастасия Самсонова суруналыыстар хамнастара кыратын бэлиэтээтэ. Авиация үлэһиттэрин профсойууһуттан Айсиэн Дегтярев “Якутия” авиа-хампаанньа билиҥҥи уустук кэмнэригэр парламентарийдар дурда-хахха, өйөбүл буолалларыгар, «Аэропорты Севера», «Якутское управление по гидрометеорологии и мониторингу окружающей среды» курдук федеральнай структуралар үлэһиттэрин хамнаһа кыратын эттэ. Доруобуйа харыстабылын идэлээх сойуустарын бэрэссэдээтэлэ Людмила Корнилова мэдиссиинэҕэ эмчиттэртэн атын үлэһиттэр эмиэ баалларын, кинилэр тарбах быыһынан хаалан хаалалларын, олору бу сырыыга болҕомтоҕо ылалларыгар туһаайда.
Дьокутааттар уонна профсойуустар хамнаһы хайдах ньыманан үрдэтэр туһунан ирэ-хоро кэпсэттилэр, бу боппуруоһу Бырабыыталыстыба таһымыгар дьүүллэһиэх буоллулар.
-
0
-
0
-
0
-
0
-
0
-
0
