Баартыйаларга

«Биир ньыгыл Арассыыйа»

Олунньу 26-28 күнүгэр «Биир ньыгыл Арассыыйа» партия регионнааҕы уопсастыбаннай приемнайыгар дьиэ кэргэттэри кытары көрсүһүөҕэ. «Президент Анал этиитэ: оҕолоох ыаллары өйүүр саҥа социальнай миэрэлэр» диэн боппуруоһунан дьону кытта көрсүөхтэрэ. Билигин оҕолоох ыаллары өйүүр үгүс социальнай бырагыраамалар үлэлээн эрэллэр. 2%-наах ипотека, ийэ хапытаала уонна чэпчэтиилээх ипотека. Бу демографияны тупсарыыга туһуламмыт миэрэлэртэн бу сорохторо эрэ. Президент 2021 сылга диэри дьааһылаларга 225 миэстэ тэрийэр туһунан сорудах биэрбит. Бу араас хайысхалаах социальнай миэрэлэр биир сыаллаахтар – Арассыыйа нэһилиэнньэтин ахсаанын аҕыйаппат. «Биир ньыгыл Арассыыйа» партия ре­гионнааҕы салаатын пресс-сулууспата иһитиннэрэринэн, олунньу 26-28 күннэригэр көрсүһүүгэ кыттыахтара: социальнай бэлии­тикэҕэ былаас уоргана,Пенсионнай фонда управлениета, оҕо быраабыгар боломуочунай, нэһилиэнньэҕэ социальнай өҥө оҥорор кииннэр, оҕолорого, дьиэ кэргэҥҥэ көмө оҥорор кииннэр. «Дьиэ кэргэни кытары көрсүһүү» уоп­састыбаннай көрсүһүүгэ ийэ хапытаалын үбүнэн туһаныыга сүбэ биэриэхтэрэ. Көрсүһүү 10-16 ч., Дьокуускай куорат Аммосов уул. 18 дьиэтигэр 2/4 кабинетыгар буолуоҕа. Билсэр телефоҥҥут: 42-39-27.

РФКП

Госдума дьокутаата Сергей Шаргунов (РФКП) парламент аллаараа палаататын көрүүтүгэр Улуу Кыайыы 75 сылын көрсө амнистияны биллэрэр туһунан уурааҕы киллэрбит. Ол туһунан Госдума электроннай базатыгар таһаарбыттар. Шаргунов хаайыыттан бу курдук категория буруйдаахтары таһаарар туһунан этэр: соруйан кыра уонна орто буруйдары оҥорон хаайыыга бастаан түбэспиттэри, сокуоннай саастарын ситэ илик ыччаты, оҕо күүтэр дьахталлары, сокуоннай саастарын туола илик оҕолордоох, инбэлиит оҕолордоох ийэлэри, соҕотох аҕалары, 55 саастарын ааспыт эр дьону, 50 саастарын ааспыт дьахталлары, I уонна II группалаах инбэлииттэри. Бу категорияҕа Аҕа дойдуну көмүскээбиттэр, байыаннай сулууспалаахтар – Афганистан, Чечня сэриилэрин кыттыылаахтара, ССРС уонна РФ судаарыстыбаннай наҕараадалаахтар, Чернобыль АЭС саахалын туоратааччылар уо.д.а. Маны таһынан 18 саастарын туолбакка сылдьан, алҕас буруйу оҥорон 5 сылга хааллыбыттары. Дьокутаат амнистия боппуруоһа хас биирдии киһиэхэ сыһыаннаан тус-туспа көрүллэр диэн тоһоҕолоон бэлиэтиир. «Соруйан билэ-билэ өлөрбүттэр, күүһүлээбиттэр, уорбуттар-халаабыттар уонна террористар амнистияҕа түбэспэттэр» диэн сурукка быһаарыллар. Амнистия туһунан боппуруоһу Госдума быһаарар. Амнистия бүтэһиктээҕин 2015 сыллаахха Улуу Кыайыы 70 сылыгар биллэриллибитэ.

“Сиэрдээх Россия”

“Сиэрдээх Арассыыйа” фракция дьокутааттара олунньу 18 күнүгэр Госдумаҕа НДС ставкатын 20%-тан 15% диэри намтатар туһунан сокуон барылын көрүүгэ киллэрбиттэр. Ол туһунан фракция салайааччыта Сергей Миронов эппит. «Бүгүн биһиги фракциябыт Госдумаҕа сокуон барылын киллэрдэ, бу сокуон барыла дойду экономикатыгар көдьүүстээх буоларыгар эрэнэбит. Биһиги Нолуок кодексыгар уларытыы киллэрэр уонна НДС ставкатын бырыһыанын 20%-тан 15% диэри кыччатар туһунан этиилээхпит”, — диэн Миронов бэлиэтээбитин партия пресс-сулууспата иһитиннэрэр. Кини этэринэн, ставканы 1% кыччаттахха олохтоох табаар, бородууксуйа түмүк сыанатын үрдэтиигэ тиэрдэр. «Чуолаан ол иһин биһиги бу экономикабытыгар көдьүүстээх буолуоҕа, бастатан туран оҥорон таһаарар бырамыыссыланнаска», — диэн «Сиэрдээх Арассыыйа» лидера эппитин «Парламентская газета» суруйар. Сокуон барылын туһунан быһаарыы сурукка: «бастакы сылларга ситэри ылыллыбат дохуоту бүддьүөккэ угуллубут резервэ үбэ толуйуон сөп» — диэн ыйыллыбыт. 2019 сыл тохсуннуь 1 күнүттэн НДС ставката 18%-тан 20% диэри үрдэтиллибитэ. Президент Владимир Путин олохтоохтор дохуоттарын үрдүк таһымҥа таһаарар сыалтан бу миэрэни ылыммыттарын туһунан эппит. РФ үбүн министиэристибэтэ суоттаабытынан, НДС ставкатын үрдэтии сылын аайы дойду бүддьүөтүн дохуотугар 620 млрд солк. эбиэн сөп.

РЛДП

Олунньу 17 күнүгэр Гос­ду­маҕа РЛДП партиятын мунньаҕа буолбут. Партия салайааччыта Владимир Жириновскай салайан ыыппыт. Бу мунньахха РЛДП регионнааҕы салаатын салайааччыта, Ил Түмэн дьокутаата Гаврил Парахин кыттыбыт. Мунньах кэнниттэн дьокутаат санаатын кытары үллэстибит: «Мунньахха кэлэн кыттыбыппыттан олус үөрдүм. РЛДП регионнааҕы салаатын үлэтин туһунан кэпсээтим. Владимир Вольфович уонна фракция атын чилиэннэрэ биһиги үлэбитин үрдүктүк сыаналаатылар, ордук култуура, спорт эйгэтин таарыйар сокуоннарга көннөрүүлэри киллэрбиппитин, СӨ бүддьүөтүн ылыныыга үлэлэспиппитин. Санатар буоллахха, Үҥкүү тыйаатырын дьиэтин өрөмүөнүгэр 13 мөл. солк., өрөспүүбүлүкэ 22 улууһугар баар хайыһар секциятын үбүлээһинигэр 16 мөл. солк. эбии үптэри көрүллэрин ситиспиппит. Хаһаайына суох кэридэх сылдьар ыттар кыһалҕаларыгар былаас болҕомтото кыратын туһунан бэлиэтээтим».