2023 сылга байыаннай сулууспаҕа күhүҥҥү ыҥырыы урукку быраабылаларынан барыаҕа. Ыҥырыллааччылар үгэс буолбут кумааҕы бэбиэскэлэри тутуохтара. Ол туhунан Госдума оборуонаҕа кэмитиэтин баhылыга Андрей Картаполов иhитиннэрдэ.
Кини этэринэн, электроннай бэбиэскэлэр байыаннай учуот реестрэ толору киллэриллиэр диэри тест эрэсиимигэр эрэ туттуллуохтара уонна кумааҕы бэбиэскэлэри хатылыахтара.
Оттон сыыппараны сайыннарыы миниистирин солбуйааччы Олег Качанов эрдэ иhитиннэрбитинэн, байыаннай учуот реестрэ Арассыыйаҕа 2025 сыл кэнниттэн эрэ толору үлэлээн барыаҕа.
«Ол эрээри билигин маннык реестри үлэлэтэр кыахха хайыы үйэ киирбит эрэгийиэннэргэ, тест быhыытынан, байыаннай сулууспаҕа ыҥырыллааччыларга электроннай бэбиэскэлэр ыытыллыахтарын сѳп», - диэн Картаполов бэлиэтээтэ.
Үѳhээ этиллибитин курдук, буолаары турар күhүҥҥү ыҥырыыга арай биир уларыйыы киириэҕэ. Ол эбэтэр, военкомакка аахсыллар биричиинэтэ суох кэлбэтэхтэргэ ыстараап кээмэйэ улаатыаҕа. Билигин бу суума 3 тыh. солк эбит буоллаҕына, 2023 сыл алтынньы 1 күнүттэн 30 тыh. солк. тэҥнэhиэҕэ.
«18-тан 30 сааска диэри саҥа ыҥырыллар саас туhунан сокуон 2024 сыл тохсунньу 1 күнүттэн үлэлиэҕэ. Оттон 2023 сыл бүтүѳр диэри 27 саастарын туолбут эдэр дьон саҥа нуормаларга түбэспэттэр, кинилэр саппааска киллэриллиэхтэрэ», - диэн дьокутаат эбэн эттэ.
Күhүҥҥү ыҥырыы алтынньы 1 күнүттэн саҕаланар. Байыаннай сулууспаҕа ылыы сылга иккитэ – муус устар 1 күнүттэн от ыйын 15 күнүгэр диэри (сааскы ыҥырыы) уонна алтынньы 1 күнүттэн ахсынньы 31 күнүгэр диэри (күhүҥҥү ыҥырыы) ыытыллар.
Онуоха сокуоҥҥа сѳп түбэhиннэрэн, РФ биэс субъегын (Саха Сирэ, Забайкальскай, Камчатскай, Хабаровскай кыраайдар, Чукотскай автономнай уокурук) 24 муниципальнай тэрээhиннэригэр гражданнар байыаннай сулууспаҕа сайын эрэ ыҥырыллаллар. Ол күhүҥҥү-кыhыҥҥы кэмҥэ тырааныспар проблемаларын кытта сибээстээх.
-
0
-
0
-
0
-
0
-
0
-
0
