Тулаайах оҕолор оҕо дьиэтиттэн көччөх буолан көтөр түгэннэригэр судаарыстыба кыбартыыранан хааччыйыахтаах, ол эрээри регионнар бу соруктарын кыайбаттар, кыбартыыра ыларга уочарат улам улаатар. Ол иһин Бырабыыталыстыбаҕа тулаайах оҕолор бэйэлэрэ дьиэни атыылаһалларыгар кыах биэрэр сертификат көмөлөһүөн сөп диэн түмүккэ кэлбиттэр. Сертификат суумата 1 мөл. 487 тыһ. солк. буолуон сөп диэн сабаҕалыыллар. Бу туһунан сокуон барылын нормативнай аакталар бырайыактарын порталыгар тахсыбыта.
Кыбартыыра барыларыгар тиийбэт
Судаарыстыбаннай информация биир кэлим тиһигин чахчыларынан, 2020 сыл тохсунньу 10 күнүгэр кыбартыыра уочаратыгар 279 260 тулаайах оҕо турар. Олортон 191 004 киһитэ 18 саастарын тахсыбыт дьон. Федерация Сэбиэтин социальнай бэлиитикэҕэ кэмитиэт салайааччыта Инна Святенко сылга 25-26 тыһ. киһи эрэ кыбартыыра ылар диэн этэр.
Үгэс курдук, дьиэ уочаратыгар тулаайах оҕолор 18 саастарын туолуохтарын иннинэ тураллар. Судаарыстыба кинилэргэ дьиэни бастаан утаа социальнай арендаҕа олоҕуран биэрэр, онтон биэс сыл ааспытын кэннэ дьиэ хаһаайына бас билиитигэр оҥотторуон сөп. Федерация Сэбиэтин социальнай бэлиитикэҕэ кэмитиэт салайааччытын солбуйааччы Ярослава Нилова оҕолорго үксүгэр хаарбах дьиэлэргэ кыбартыыралары биэрэллэр диэн этэр. «Дьиэ биэрдибит диэн «галочка» туруораллар, оттон бу дьиэҕэ усулуобуйа олус мөлтөх буолар», — диэн дьокутаат «Парламентскай хаһыакка» санаатын эппит. Кини регионнарга бу маннык көстүү бырагырааманы ситэ үбүлээбэттэриттэн тахсар диир.
Сертификат көмөлөһүө этэ
РФ Үөрэҕириитин министиэристибэтигэр “Тулаайах уонна төрөппүттэрин көрүүтэ суох хаалбыт оҕолор социальнай өйөбүллэрин эбии миэрэлэрин туһунан” сокуоҥҥа уларытыы киллэрэргэ уолдьаспытын уонна дьиэ сертификатын туһунан ыстатыйа киллэрэр тоҕоостооҕун бэлиэтээбиттэр. Докумуоҥҥа этиллэринэн, тулаайах оҕоҕо биир кэмнээх 1,487 мөл. солк. суумалаах сертификат бэриллэр. Бу сууманы Арассыыйаҕа 2019 сыл IV кыбартаалыгар дьиэ кв. миэтэрэтин иэнэ 45 тыһ. солк. тэҥнэспититтэн таһаарбыттар. Оттон сертификат ылааччы 33 кв. миэтэрэ иэннээх дьиэни ылар бырааптаах.
Регионнар тулаайах оҕолорго анаммыт дьиэ испииһэгин оҥоруохтара
Сокуон барылыгар оҕолор бырааптара быһыллыбыт төрөппүттэрин кытары олороллорун бобор усулуобуйаны киллэрбиттэр. Оҕо дьиэтиттэн сааһа туолан тахсыбыт ыччаи арыгыһыт, наркоман, хаайыыга олоро сылдьыбыт төрөппүтүн кытары олороро бобуллар. Докумуоҥҥа этиллэринэн, сыл аҥарыгар биирдэ тулаайах оҕолор олохтоох сирдэригэр боломуочуйалаах уоргаҥҥа кэлэн ханна, хайдах усулуобуйаҕа, кимниин олороллорун туһунан биллэриэхтээхтэр. Оннук иһитиннэрии оҥорботохторуна, кыбартыыраҕа наадыйар дьон испииһэгиттэн кинилэри сотон кэбиһиэхтэрин сөп.
Оттон кыбартыыра ылбыт тулаайах оҕолорго сыһыаннаан, сокуон барылыгар социальнай аренда болдьоҕун икки сылынан кыччатар туһунан уларытыы киллэрбиттэр. Өскөтүн кыбартыыраны тулаайах оҕо бырагырааматынан ылбыт киһи сааһа 25 үөһэ уонна үлэлээх-хамнастаах, коммунальнай төлөбүрүгэр, нолуокка иэһэ суох, буруйу оҥорууга бэлиэтэммэтэх буоллаҕына.
Өссө биир киллэрэ сатыыр уларытыыларынан, боломуочуйалаах уорганнар тулаайах оҕолорго биэрбит кыбартыыраларын реестрын оҥорон, бу дьиэлэр туруктарын көрө сылдьыахтаахтарын туһунан буолар.
Сардаана КУЗЬМИНА
-
0
-
0
-
0
-
0
-
0
-
0
