Сокуон барылын Госдуума судаарыстыбаннай тутулга кэмитиэтин бэрэссэдээтэлэ, сокуон ааптардарыттан биирдэстэрэ Павел Крашенинников билиһиннэрдэ. Кини сокуон барыла Госдуумаҕа 2021 сыл ахсынньы 16 күнүгэр киллэриллибитин, 2022 сыл тохсунньутугар бастакы ааҕыыны ааспытын, иккис ааҕыыны 2025 сыл олунньу 26 күнүгэр ааспытын санатта уонна ылыныллыбыт сокуон бэчээттэммитин кэннэ, 90 хонугунан күүһүгэр киирэрин бэлиэтээтэ. Ону тэҥэ, 2027 сыл тохсунньу 1 күнүгэр диэри эрэгийиэннэр бэйэлэрин сокуоннарын бу саҥа сокуоҥҥа сөп түбэһиннэриэхтээхтэрин иһитиннэрдэ.
Сокуону ылынарга 318 дьокутаат, утары 80 дьокутаат куоластаата, биир дьокутаат туттунна.
ххх
Санатан бэлиэтээтэххэ, соторутааҕыта Ил Түмэҥҥэ “Биир Ньыгыл Арассыыйа” баартыйа фракциятын салайааччыта Алексей Колодезников билиһиннэрбитинэн, фракция чилиэннэрэ бу сокуон барыла Госдуумаҕа бастакы, иккис ааҕыыны ааһар кэмигэр ымпыктаан-чымпыктаан үөрэппиттэрин эппитэ.
“Көстөрүн курдук, дойду эрэгийиэннэрин этиилэрин, туруорсууларын кэнниттэн сокуон барылыгар балачча көннөрүүлэри киллэрбиттэр. Онон Госдуума уонна Арассыыйа субъектарын сокуону оҥорооччуларын кытта бэрт көдьүүстээх хардарыта сыһыан олохтоммута көстөр. Ону таһынан, Госдуумаҕа киирбит баартыйалар дьокутааттара сокуон барылын тэҥҥэ оҥорсубут ааптардарынан буолаллара бэрт улахан суолталаах”, - диэн фракция салайааччыта бэлиэтиир.
Алексей Зосимович бу сокуон Госдуумаҕа ылылыннаҕына, Федерация Сэбиэтигэр өйөннөҕүнэ уонна Арассыыйа Бэрэсидьиэнэ бигэргэттэҕинэ, Ил Түмэҥҥэ «Биир Ньыгыл Арассыыйа» баартыйа фракциятын чилиэннэрэ сокуон өрөспүүбүлүкэҕэ олоххо киириитигэр эппиэтинэстээхтик ылсыахтара диэн быһаарар. Ол курдук: «Саха Сирин Ил Дархана Айсен Сергеевич Николаев биһиги өрөспүүбүлүкэбитигэр икки таһымнаах муниципальнай былаас тиһигэ оннунан хаалыаҕа диэн чопчу позициятын биллэрбитэ», - диэн чорботон тоһоҕолоото.
Сокуон барылын билиҥҥи эрэдээксийэтэ этэринэн, эрэгийиэннэр муниципальнай былаас хас таһымнаах буоларын - биир дуу, икки дуу буоларын бэйэлэрэ быһаарыахтарын сөп. Ол аата, эрэгийиэн дьокутааттара билиҥҥини баарынан хаалларарга быһаардахтарына, уларыйыы тахсыбат, уруккутун курдук икки таһымнаах буолар. Оттон дьокутааттар биир таһымнаах былааһы киллэрэргэ диэн куоластаатахтарына, куораттааҕы уокуруктары уонна муниципальнай уокуруктары территориальнай олохтоох дьаһалталарынан уларытан тэрийии соруга турар. Сокуон барылыгар ыйыллыбытынан, куораттааҕы уонна муниципальнай уокуруктар бэрэстэбиитэллээх уорганнарын дьокутааттара уруккутун курдук муниципальнай быыбардарынан талыллыахтаахтар. Оттон баһылыктары талыы үс көрүҥнээх буолар: муниципальнай быыбардарынан талыы, муниципальнай тэрээһин бэрэстээбиитэллээх уорганнара бэйэлэрин састааптарыттан эбэтэр муниципальнай тэрээһин бэрэстэбиитэллээх уорганнара эрэгийиэн баһылыга киллэрбит кандидааттарыттан талыахтарын сөп.
Биллэрин курдук, бу ураты суолталаах сокуон барылын дьүүллэһии бара турдаҕына, 2022 сыллаахха Саха Сирин парламена эрэгийиэннэргэ олохтоох салайыныы уорганнарын үлэлэрэ уратылааҕын, араастааҕын туһунан этиилэри киллэрбитэ.
Хаартыска: Госдума саайтан
-
0
-
0
-
0
-
0
-
0
-
0
