Сир Кодексыгар маннык көннөрүүлэри Росреестр оҥорбутун бырабыыталыстыба палаатаҕа 2021 сыл алтынньытыгар киллэрбитэ. Билигин сокуон быһыытынан, судаарыстыбаннай биитэр муниципальнай бас билиигэ сылдьар санитарнай харыстабыл зонатын (ЗСО) бастакы уонна иккис курдааһыныгар киирэр, киһи иһэригэр уонна хаһаайыстыбаннай сыалга туһаныллар ууну хааччыйар эбийиэктэри (үрэҕи, сыркыны, дьүүктэни..) эргитии хааччахтанар итиэннэ чааһынай бас билиигэ биэрии бобуллар. Саҥа ылыллыбыт сокуон санитарнай харыстабыл зонатын иккис курдааһыныттан хааччахтааһыны устар. Олох көрдөрүнэн, ЗСО бастакы курдааһынгар киирэр эбийиэк – кытаанах эрэсиимнээх, ууну ылар сир территорията буолар, оттон иккис курдааһын өрүскэ, ханааларга, күөллэргэ сыстар территория.
Сокуон барылын быһаарыытыгар маннык сирдэри приватизациялааһын уу эбийиэктэрин киртийиитигэр кутталы оҥорботун, санитарнай ирдэбил сокуонун тутуһуу сир учаастагын бас билии көрүҥүттэн тутулуга суоҕун туһунан суруллубут. Оттон Росреестр ити хааччахтан иҥнэн, тыһыынчанан гражданнар, биирдэм урбаанньыттар, юридическай сирэйдэр бас билиилэрин эбийиэктэрэ баар сирдэрин учаастагын докумуоннатар кыахтара суоҕун, ол «даача амнистиятынан» даҕаны сатамматын итиэннэ нэһилиэстибэҕэ биэрэллэрэ эмиэ табыллыбатын туһунан этэр. Ону таһынан хааччах бүддьүөккэ нолуок киириитигэр биллэрдик дьайар эбит.
– 1980 сыллаахтан 2010 сыллаахха диэри (Москватааҕы уу ситимигэр ЗСО иккис курдааһыныгар хааччах киириэҕиттэн) Москва уобалаһыгар, ЗСО иккис курдааһынын кыраныыссатыгар 7466 хапытаалынай тутуу эбийиэгэ, ол иһигэр 33 элбэх кыбартыыралаах олорор дьиэ, 5255 чааһынай дьиэ, 2153 үлэ-хамнас, бырамыысаланнас, эргиэн эбийиэктэрэ, логистика комплекстара тутуллубут, – диэн этиллэр сокуон барылын быһаарар сурукка. Онон, сокуону ылыныы аҥардас Москва уобалаһын бүддьүөтүгэр сир учаастактарын атыылааһынтан уонна тыырыыттан сыллата 4,5 млрд солкуобай харчыны киллэриэхтээх эбит.
-
0
-
0
-
0
-
0
-
0
-
0
