Мунньаҕы Ньурба улууһун култуураҕа департаменын салайааччыта Розалия Тихонова уонна улуус бочуоттаах олохтооҕо, архыып дьыалатын уонна култуура туйгуна Айталина Захарова иилээн-саҕалаан ыыттылар. Кэпсэтиигэ улуус баһылыга Алексей Иннокентьев, “Бичик” кинигэ кыһатын генеральнай дириэктэрэ Август Егоров уонна култуура үлэһиттэрэ кыттыстылар.
Антонина Афанасьевна “Айар Кут” устуудьуйаттан быһа сибээскэ таҕыста. Вице-спикер 2020 сылтан информация технологияларын туһаныыга саҥа кэрдиис кэм саҕаламмытын бэлиэтээтэ. Ол курдук, дьон-сэргэ олоҕор ыраахтан олорон үлэлээһин араас ньымалара бигэтик киирбиттэрин эттэ.
Антонина Григорьева ааһан эрэр сылга Ньурба улууһугар култуура эйгэтигэр элбэх дьаһал олоххо киирбитин санатта. Ньурба куоратын Убайаан микро-оройуонугар Г.Ф. Сафронов аатынан кииннэммит бибилэтиэкэ аһыллыбыта, К.Д. Уткин аатынан норуоттар доҕордоһууларын түмэлин экспозицията саҥардыллыбыта, Маалыкайга 170 миэстэлээх норуот айымньытын дьиэтэ үлэҕэ киирбитэ, олохтоох көҕүлээһин бырайыагынан “Дьол түһүлгэтэ” сынньалаҥ уонна этнография түһүлгэтэ тутуллубута.
Антонина Афанасьевна 2021 сылга улуустар модельнай бибилэтиэкэлэрин пуондаларын кэҥэтэллэригэр 3 мөл. 97 солк. көрүллүбүтүн эттэ. “Быйыл пуондаҕа 26,4 % нуорматтан аҕыйах үбүлээһин көрүллүбүтэ”, – диэтэ. Вице-спикер улуус култууратын үлэһиттэригэр хааччахтааһын кэмигэр дьон санаатын көтөҕөр араас тэрээһиннэри, аахсыйалары ыыта олороллоругар махтанна.
Аҕыйах хонуктааҕыта “Бичик” кинигэ кыһатын генеральнай дириэктэрэ Август Егоров улуус баһылыгар Алексей Иннокентьевка “Саамай ааҕар улуус” диэн өрөспүүбүлүкэтээҕи куонкурс кыайыылааҕын статуэткатын туттарбыта. Онон ньурбалар өрөспүүбүлүкэҕэ саамай ааҕар улуус аатын ылбыттара.
Улуус баһылыга Алексей Иннокентьев хамсык кэмэ култуура эйгэтигэр үгүс ыарахаттары үөскэппитин ыйда. Ол гынан баран, “култуура тэрилтэлэрэ саҥа уустук усулуобуйаҕа үлэлии үөрэннилэр” диэн бэлиэтээтэ.
Маны таһынан, Норуоттар доҕордоһууларын дьиэтин дириэктэрэ Анна Туманова, Ньурбатааҕы оҕо ускуустубатын оскуолатын дириэктэрэ Елизавета Евсеева, Ньурбатааҕы киин бибилитиэкэ дириэктэрэ Анна Багмет, култуура департаменын салайааччыта Розалия Тихонова тыл эттилэр уонна ойуулаах-дьүһүннээх дакылааттары оҥордулар.
Аканаттан элбэх хайысхалаах култуура киинин дириэктэрэ Агафия Ноева, Маалыкайтан “Айар киин” уус-уран салайааччыта Иван Харитонов бэйэлэрин үлэлэрин уопутун билиһиннэрдилэр.
-
0
-
0
-
0
-
0
-
0
-
0
