Ол курдук, билимҥэ, үөрэххэ, култуураҕа, киэҥник иһитиннэрэр-биллэрэр тэриллиилэргэ уонна уопсастыбаннай тэрилтэлэргэ сис кэмитиэтин бэрэссэдээтэлэ Феодосия Габышева, итиэннэ доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэт бэрэссэдээтэлэ Владимир Чичигинаров кэмитиэттэр чилиэннэрин илдьэ тахсаннар, улууспут олоҕун-дьаһаҕын, дьон санаатын быһаччы көрдүлэр-иһиттилэр. Ол түмүгэр олус суолталаах быһаарыы ылыллыбыта. Оскуола уонна уһуйаан медицинскэй үлэһиттэригэр хамнас пуондата тэрилиннэ. Улууспут 18 уһуйааныгар эбии штат уонна ити пуондаттан социальнай өйөбүллээх төлөбүр көрүллэр буолла.
Амма тыа хаһаайыстыбалаах улуус буоларынан, бу салааҕа тахсар уларыйыы, үөскүүр кыһалҕа барыта харахпыт далыгар сылдьар. Ил Дархан дьаһалынан кэтэх хаһаайыстыбаларыгар сүөһүлээх ыаллары өйүүргэ харчынан өйөбүл оҥоһулларыгар “2,5 гектар сирдээх буолуохтаах” диэн ирдэбил харгыс буоларын аммалар хара ааныттан утарбыппыт. Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкины ыҥыран таһааран, хаһаайыстыбаларга сырытыннарбыппыт, тыа сирин үлэһит дьонун кытта сирэй көрүһүннэрбиппит эмиэ түмүктээх буолла диэн астынабыт.
Амма улууһа Саха Өрөспүүбүлүкэтин норуоттарын VII спортивнай оонньууларын үрдүк таһымнаахтык тэрийэн ыыппытыгар Ил Түмэн өттүттэн Михаил Гуляев салайааччылаах кэмитиэт тэҥҥэ үлэлэспитэ үтүө түмүктээх буолбутун махтанан ахтыам этэ. Улахан күрэхтэһиини көрсө тутуллубут эбийиэктэри көрүү-истии ороскуотун толуйуу боппуруоһугар тиийэ быһаарсыбыппыт улууспут инники сайдыытыгар тирэх буолара чуолкай.
Ил Түмэн Бэрэссэдээтэлин солбуйааччы Антонина Григорьева социальнай боппуруостарга эппиэттээх салайааччы буоларынан биһигинниин мэлдьи ыкса үлэлэһэр, туох кыалларынан көмөлөһө сатыыр. Антонина Афанасьевналыын кэпсэтэргэ судургу, үлэлииргэ чэпчэки. Амма уонна Уус Майа улуустарыттан Ил Түмэҥҥэ дьокутааттарбыт Руслан Федотов уонна Сергей Ларионов уокуруктарын быыбардааччыларыгар мэлдьи көмөлөһөллөр, кыһалҕабытын быһаарсарга өрүү бэлэмнэр.
Улуус дьокутааттарын сүбэтэ улуус дьаһалтатын кытта биир сүбэнэн өйдөһөн үлэлиибит. Ити курдук бары таһымҥа биир өйүнэн-санаанан салайтаран үлэлиир буоллахха, ыраах даҕаны чугаһыыр, ыарахан даҕаны чэпчиир эбит. Бэйэм быраас буоларбынан, Ил Дархаммыт 2021 сылы Доруобуйа сылынан биллэрбититтэн өрө көтөҕүллэн тураммын Сахам сирин уонна Аммам улууһун дьонун-сэргэтин Саҥа сылынан эҕэрдэлиибин уонна барыгытыгар чэгиэн-чэбдик, дьоллоох олоҕу баҕарабын. Түмсүүлээх буоллахпытына биирдэ хамсык дьаҥын хаптатыахпыт, ыарыыны кыайыахпыт!
Софья Александрова,
Амма улууһун Мунньаҕын бэрэссэдээтэлэ
Хаартыскаҕа (хаҥастан уҥа): Чурапчы улууһун мунньаҕын бэрэссэдээтэлэ А.Захаров, Амма улууһун Мунньаҕын бэрэссэдээтэлэ С.Александрова, Ил Түмэн дьокутаата А.Атласова, Мэҥэ Хаҥалас улууһун Мунньаҕын бэрэссэдээтэлэ П.Сазонов.
-
0
-
0
-
0
-
0
-
0
-
0
