Видеокэмпириэнсийэҕэ 20 №-дээх Айхаллааҕы быыбардыыр уокурук олохтоохторо кыттыстылар. Ол курдук, М. диэн гражданин дьэллик ыттар боппуруостарыгар санаатын эттэ. Кини быһааран биэрбитинэн, Мииринэйгэ дьэллик ыттары тутарга аналлаах эбийиэк наадатын ыйда. Билигин баар ирдэбилгэ ырааҕынан эппиэттээбэт эбит. Бүгүҥҥү күҥҥэ ыттары чииптээн баран, босхо ыытарга күһэллэллэрин туһунан кэпсээтэ.
Юрий Михайлович бу боппуруоска 2020 сыл саҥатыттан дьиэ кыылыгар эппиэтинэстээхтик сыһыаннаһыы сокуонун балаһыанньата олоххо киирбитин туһунан санатта. Ити балаһыанньа сорох өттө дьэллик сылдьар кыылларга сыһыаннаахтар. «Ыт ахсаана аҕыйаабата. Уулуссаҕа бэйдиэ барбыт ыттар бары үөрүнэн холбоһон, кинилэр ордук суостаах буолаллар уонна нэһилиэнньэҕэ кутталы үөскэтэллэр. Ил Түмэн дьиэ кыылыгар эппиэтинэстээхтик сыһыаннаһыы сокуонугар уларытыылары киллэрэргэ этиилээх. Ол эрээри, билигин ити өттүгэр сөптөөх хамсааһын тахса илик», – диэн парламентарий эттэ. Билигин көрүүтэ суох сылдьар кыылларга 2020 сыл тохсунньу 1 күнүттэн «тутуу -- “ыраастааһын” – вакцинациялааһын – төттөрүү ыытыы» диэн ис хоһоонноох бырагыраама олоххо киирбитэ. Холобур, ыты тутан баран, анал сиргэ илдьэн туттарыллыахтаах, ити бырассыас барыта видеоҕа уһуллуохтаах.
Итини тэҥэ, М. диэн гражданин Мииринэй поликлиникатыгар «узкай” дэниллэр исписэлиистэр тиийбэттэрин туһунан иһитиннэрдэ. Юрий Михайлович ити боппуруоска Мииринэйгэ доруобуйа харыстабылын сайыннарыы комплекснай былааны олоххо киллэрии саҕаламмытын туһунан эттэ. 2025 сылга диэри ити былааны олоххо киллэриигэ 994 мөл. солк. кэриҥэ көрүллүөҕэ. Ити үп бастакы мэдиссиинискэй көмөнү оҥорууга, мэдиссиинэ тэрилтэригэр хапытаалынай өрөмүөнү ыытыыга, саҥа оборудованиелары атыылаһыыга туһаныллыаҕа.
Салгыы С. диэн гражданин Айхалга эргэ дьиэни көтүрүү боппуруоһунан Росреестр базатыгар суохтарын туһунан иһитиннэрдэ. Онуоха Юрий Николаев соторутааҕыта, от ыйын 10 күнүгэр, Мииринэй оройуонун социальнай-экэномиичэскэй сайдыытын боппуруостарыгар аналлаах мунньахха кыттыбытын туһунан эттэ. Онно «АЛРОСА» хампаанньа бэрэстэбиитэллэрэ, оройуон салайааччылары кыттыбыттара. «Онно Ил Дархан Айсен Николаев Айхалга саахалланар туруктаах дьиэттэн көһөрүү үлэтэ 2022 сыл бүтүөр диэри ыытыллыахтааҕын туһунан эппитэ. Бырагырааманы барытын олоххо киллэриигэ өрөспүүбүлүкэ, оройуон уонна «АЛРОСА» хампаанньа бүддьүөттэрэ кыттыһыахтарын наада. Айхал бөһүөлэгэр хампаанньа үлэһиттэрэ саахалланар туруктаах дьиэҕэ олороллоро учуоттанан, бырагырааманы олоххо киллэриигэ 2021 сылга 24 мөл. солк, 2022 сылга 91 мөл. солк. тыырыллыахтааҕа быһаарыллыбыта», - диэн Юрий Михайлович эттэ.
Салгыы видеокэмпириэнсийэ көмөтүнэн Мииринэй оройуонуттан В. диэн гражданин кытынна. Кини куорат аттыгар уонна пааркаҕа бэлэсипиэт анал ыллыга наадатын туһунан ыйда. Бу туруорсууга парламентарий сөптөөх быһаарыыны биэрдэ.
Норуот дьокутаата Юрий Николаев көрсүһүүнү түмүктүүрүгэр, Саха сиринээҕи «Биир ньыгыл Арассыыйа” баартыйа Мииринэйдээҕи сэкирэтээрэ Анатолий Платоновы уонна коммуникацияҕа менеджерэ Татьяна Черепанованы кытта баартыйа үлэтин күүһүрдэргэ этиилэри истэн, ол туһунан быһаарыстылар.
Ил Түмэн пресс-сулууспатын матырыйаалынан.
-
0
-
0
-
0
-
0
-
0
-
0
