-- Бастатан туран, дойду Төрүт сокуонун сүрүн оҥкула оннунан хаалла. Арассыыйаҕа дьон үлэтэ, доруобуйата көмүскэллээх буолара, хамнас алын кээмэйэ мэктиэлэнэллэр. Оҕо аймахха, дьиэ кэргэҥҥэ, доруобуйаларыгар хааччахтаах уонна аҕам саастаах дьоҥҥо судаарыстыбаттан өйөбүл күүһүрэр. Ону кытта дьон быраабын, көҥүлүн туһунан позиция оннунан хаалла. Федеративнай тутул иһигэр өрөспүүбүлүкэ туспа Төрүт сокуоннаах, судаарыстыбаннай тыллаах уонна кыраныыссалаах федерация иһигэр киирсэр тутул курдук хаалар. Уларытыыны киллэрбит ыстатыйаларга оҕо аймах сайдыыта судаарыстыба бэлиитикэтин биир суолталаах хайысхатынан буолара ыйыллар. Оҕо өй-санаа, духуобунай, эт-хаан өттүнэн сайдарыгар судаарыстыба усулуобуйа оҥоруохтаах.
РФ уонна субъектар бииргэ үлэлээһиннэригэр доруобуйа харыстабылын боппуруостара сүнньүнэн чуолкайдык быһаарыллыбыт. Мэдиссиинэ көмөтө хаачыстыбаннай уонна тоҕоостоох буоларын, дьон доруобуйатын бөҕөргөтүү, чөл сиэрдээх олоҕу тутуһууга усулуобуйаны оҥоруу, нэһилиэнньэ бэйэтин доруобуйатыгар эппиэтинэстээхтик сыһыаннаһыы култууратын тэрийии тустарынан этиллэр.
РФ үбүн тиһигин туһунан ыстатыйаҕа социальнай мэктиэлэр туһунан пууннарынан толоруллан бэриллибит. Арассыыйа Федерацията олохтоохторун үлэтин ытыктыыр уонна кинилэр бырааптара күөмчүлэммэтигэр үлэлиирэ ыйыллар. Хамнас алын кээмэйэ олох тиийинэн олоруу кээмэйиттэн кыра буолуо суохтааҕа, биэнсийэ сылын аайы индексацияланара мэктиэлэнэр. Онон РФ Төрүт сокуонугар киирбит уларытыылар РФ бырабыыталыстыбата социальнай хайысхалаах судаарыстыбаннай бэлиитикэни ыытарыгар туһуланаллар.
Маны таһынан бүгүн ытыктабыллаах мэдэссииннэ үлэһиттэрин идэлээх бырааһынньыктарынан эҕэрдэлиибин! Коронавирус ыарыы пандемията аан дойдуга кытаанах ыспытаанньанан буолла. Эһиги күүстээх санааҕыт уонна идэҕитигэр бэриниигит көмөтүнэн дьон үтүөрэн олохторун салгыыллар. Баҕарабын эһиэхэ кытаанах доруобуйаны, дьиэ кэргэҥҥитигэр эйэни уонна дьолу!
-
0
-
0
-
0
-
0
-
0
-
0
