СӨ Тырааныспарга уонна суол хаһаайыстыбатыгар миниистир Владимир Сивцев өрөспүүбүлүкэҕэ саамай улахан инфраструктурнай бырайыак туһунан билиһиннэрдэ. Күргэ тутулуннаҕына Илин Сибиир Магаданскай уобалаһы кытта төгүрүк сыл үлэлиир массыына суолунан хааччыллыахтаах.
Миниистир быһааран биэрбитинэн, кыра массыыналар босхо айанныахтара, оттон чэпчэки грузовиктар 1115 солк., ыарахан таһаҕаһы тиэйэр улахан фуралар 2395 солк. төлүөхтэрэ. Онон күргэ тутуутугар угуллубут үп ити курдук төннүөхтээх.
Экэниэмикэ сайдыытыгар күргэ тутуута эргиччи көдьүүстээх өттүнэн дьайыаҕа, өрөспүүбүлүкэ иһигэр оҥоһуллар табаар ВРП сыл ахсын 2,5-3% үрдүөҕэ, хоту табаары тиэйэргэ бүддьүөт ороскуота сылга 8,8 млрд. солк. аччыаҕа диэн ааҕаллар.
Күн бүгүн Өлүөнэ эбэ хаҥас уонна уҥа кытылыгар күргэ тутуутун үлэтэ ыытылла турар, киирэр суолу оҥорорго ойууру солоон, кумаҕы, үлтүркэй тааһы куппуттар, арматурнай каркааһы, буронабивной сыбаайалары туруорбуттар.
Хаҥас кытылга күргэ атаҕар кофердамы хомуйарга былаһаакканы бэлэмнээбиттэр, тимир, бетон билиитэлэри уурбуттар. Сэтинньигэ күргэ бастакы атаҕа бүтүөхтээх. Уҥа кытылга технологическай былаһааккалары, инфраструктураны, күргэҕэ киирэр суолу бэлэмнииллэр, ол суол «Лена» федеральнай айан суолугар тахсыахтаах. Муоста тутуута тохтообокко төгүрүк сыл барыахтаах. Тутууга 295 киһи, 95 тиэхиньикэ үлэлиир.
Өлүөнэ эбэни туоруур күргэни тутуу ороскуота 174,8 млрд. солк., федеральнай бүддьүөттэн 65 млрд. солк, эрэгийиэн бүддьүөтүттэн 27,3 млрд. солк. киириэхтээх, чааһынай үбүлээһин 82,5 млрд. солк.
Ол туһунан сиһилии "Ил Түмэн" хаһыат кэлэр нүөмэригэр ааҕыҥ.
Василий Кононов хаартыскаҕа түһэриитэ.
-
1
-
0
-
0
-
0
-
0
-
0
