Ол туһунан Ил Түмэн түөрт сис кэмитиэтин кыттыгас кэҥэтиллибит мунньаҕар СӨ Бырамыысыланнаска уонна геологияҕа миниистирин бастакы солбуйааччыта Михаил Кириллин иһитиннэрдэ.
Каадырдары бэлэмнииргэ оскуолаҕа профильнай кылаастар үлэлииллэр, геологияҕа олимпиада ыыталлар. Бырамыысыланнас идэлэрин баһылыырга Алданнааҕы политиэхиньиичэскэй, Ньурбатааҕы, Өлүөхүмэтээҕи, Ленскэйдээҕи тиэхиньикумҥа, Саха Сирин соҕурууҥҥу технологическай кэллиэһигэр, Сунтаардааҕы кэллиэскэ, ХИФУ хайа, тиэхиньиичэскэй үнүстүүтүгэр үөрэниэххэ сөп.
Өрөспүүбүлүкэ бырамыысыланнас хампаанньаларын кытта социальнай-экэнэмиичэскэй сайдыыга 100 тахса сөбүлэһиини түһэрсибит, ол чэрчитинэн 2025 с. 6,4 млрд. солк. кээмэйдээх өйөбүл оҥоһуллубут. 4,6 тыһ. гектар ойууру чөлүгэр түһэрбиттэр, 90 мөл. балык ыаматын өрүстэргэ ыыппыттар. Олохтоох нэһилиэнньэттэн 10 000 киһи былырыын сир баайын хостуур салааҕа үлэҕэ киирбит.
«АЛРОСА» хампаанньа холобурун ылан көрдөххө, 2021-2025 сс. түһэрсиллибит сөбүлэһии чэрчитинэн Анаабыр, Өлөөн, Эбээн-Бытантай улууһун сайыннарарга 17,5 млрд. солк. көрүллүбүт, сыл ахсын социальнай инвестиция оҥоһуллар, өрөспүүбүлүкэ социальнай-экэнэмиичэскэй сайдыытыгар тэрилтэ бэйэтин кылаатын киллэрэр.
«Nordgold» Өлүөхүмэ улууһугар хотугу аҕыйах ахсааннаах норуоттары өйүүргэ уһун кэмнээх бырагырааманы олоххо киллэрэр. Тээнэ көһө сылдьар общинатын кытта таба иитиитин сайыннарарга, олохтоох нэһилиэнньэ социальнай көмүскэлин күүһүрдэргэ тустаах үлэни ыытар. Ону таһынан, Тээнэҕэ уһуйаан-оскуоланы тутуохтаах.
«Полюс Алдан» үлэлиир сиригэр ускуустуба оскуолатын саҥардыахтаах, култуура пааркатын устуоруйаны, кыраайы үөрэтэр түмэли, култуура киинин, киинэ тыйаатырын оҥоруохтаах.
«Роснефть» Мииринэй улууһун Таас Үрэх нэһилиэгэр МФЦ дьиэтин тутуохтаах. Ити курдук бырамыысыланнай хампаанньалар айылҕа баайын хостуур сирдэригэр олохтоох нэһилиэнньэ олоҕун тупсарарга, социальнай эбийиэктэри тутарга, өрөмүөннүүргэ, эрэгийиэни сайыннарарга үлэлэһэллэр.
Хаартыска СИА.
-
0
-
0
-
0
-
0
-
0
-
0
