Тополинай бөһүөлэгиттэн 16 км. сиргэ хайаны байытар фабриканы уһатыллыбыт болдьохтоох кыһыҥҥы суол кытыытыгар тутуохтара. Өрөспүүбүлүкэҕэ вольфрамы хостуур салааны үлэлэтэргэ 70 млрд. солк. үбү уган, хайаны байытар киин инфраструктуратын тутуохтара, анал тиэхиньикэни атыылаһыахтара. Вольфрамы байыаннай бырамыысыланнаска, ону тэҥэ металлургияҕа, тиэхиньикэҕэ туттуохтара.
Фабрика сылга 1,5 мөл. туонна урууданы таҥастыаҕа, дойду наадыйыытын 2030 с. 38% хааччыйыаҕа. Вольфрам дэписиит буолан, Арассыыйаттан тас дойдуга таһаарар бобуллан турар.
«Полиметалл» Арассыыйаҕа кыһыл көмүс саппааһынан төрдүс миэстэҕэ турар Нежданинскайы 2021 с. үлэҕэ киллэрбитэ, айылҕа баайдаах сиргэ суолу, муостаны туттулар, уоту тартылар.
2026 с. хампаанньа үлэһиттэрин ахсаана 2000 киһиэхэ тиийбит, инникитин саҥа эбийиэктэр үлэҕэ киирдэхтэринэ, 3000 тахса киһиэхэ диэри улаатыахтаах. Билигин үлэһиттэр 30%-нара - Саха Сирин олохтоохторо. Хаандыгаҕа баар хайа геологическай тиэхиньикумугар саҥа идэлэри киллэрбиттэр, СӨ Дьарыктаах буолууга киинин кытта сөбүлэһиини түһэрсибиттэр.
2026 с. тэрилтэ 11,8 млрд. солк. нолуогу төлүөхтээх, 2030 с. ити көрдөрүү 18 млрд. солк. тиийиэхтээх, кэлэр сылларга өссө эбиллэн иһиэхтээх. Хампаанньа өрөспүүбүлүкэ социальнай-экэнэмиичэскэй сайдыытыгар 2026 с. ааҕан туран 4,6 млрд. солк. ыыппыт. Суолу, муостаны тутууга 4,2 млрд. солк. туттуллубут, социальнай бырайыактары өйүүргэ 428 мөл. солк. көрүллүбүт. Итиэннэ тэрилтэ Тополинайга интэринээттээх оскуоланы тутуу бырайыагын оҥорууга 21 мөл. солк ыытыахтаах.
Вольфрамы хостуур фабриканы Томпо өрүс үөһээ өттүгэр тутуохтаахтар, ону олохтоохтор иһэр ууга хайдах дьайыан сөбүй диэн долгуйаллар. Ол иһин көхтөөх дьону мунньан, «Полиметалл» эбийиэгэр илдьэн хайдах үлэлииллэрин, кек (бырамыысыланнай тобох) ыскылаатын көрдөрбүттэр. Ону таһынан, Тополинайга исписэлиистэри ыҥыран, уу туругун кэтээн көрүөхтэрэ. Ол түмүгэр олоҕуран, ууну баһар ыстаансыйаны уларытыахтара, эбэтэр көһөрүөхтэрэ.
Фабрика тулалыыр эйгэҕэ таһаарар хоромньутун кыччатарга ууну ыраастыыр тэрили тутуохтара, ойууру чөлүгэр түһэриэхтэрэ, өрүскэ балык ыаматын ыытыахтара.
Экэниэмикэҕэ, инвестиционнай уонна бырамыысыланнай бэлиитикэҕэ сис кэмитиэт бэрэссэдээтэлэ Павел Петров этэринэн, Ил Түмэн «Полиметалл» хампаанньаны кытта 2019 с. бииргэ үлэлэһэр, тэрилтэ өрөспүүбүлүкэни кытта сөбүлэһии түһэрсибит. Ол түмүгэр «Дьааҥы» суол, үс муоста өрөмүөннэммит. Норуот дьокутааттара Нежданинскайга миэстэтигэр тиийэн, үс мунньаҕы ыыппыттар, быйыл Тополинайга бара сылдьан балаһыанньаны билсиэхтэрэ.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
