Федеральнай киин уонна өрөспүүбүлүкэ таһымыгар дьон дьадайыытын тохтоторго оҕолоох ыаллары өйүүллэр, кинилэргэ биир кэлим босуобуйа төлөнөр. Ону таһынан, урбааны, кэтэх хаһаайыстыбаны сайыннараллар, социальнай хантыраагы түһэрсэллэр, судаарыстыбаннай тэрилтэҕэ үлэлиир дьон хамнаһын кыралаан үрдэтэргэ үлэ ыытыллар.
Дьадайыыны аҕыйатарга өрөспүүбүлүкэҕэ 17 хайысхалаах бырайыак бартыбыала оҥоһуллубут, онно 14 бырайыак, 3 кэлим тэрээһин киирбит. Бырайыактары олоххо киллэрэргэ ситэриилээх былаас, олохтоох бэйэни салайыныы уорганнара, тустаах министиэристибэлэр үлэлэһэллэр. Экэниэмикэ билигин төһө даҕаны уустук кэмҥэ үлэлээтэр, былырыын тус сыаллаах соруктары толордулар.
Ил Дархан стратегическай ыйааҕын чэрчитинэн дьон дьадайыытын аҕыйатан, дохуоттара таҥнары түһүүтүн сэрэтиэхтээхтэр. Үп-харчы өттүнэн быстарыыны аҕыйатарга ону 2029 с. диэри ситиһэргэ сэттэ сорук чопчуламмыт. Бастакытынан, үп-харчы өттүнэн уустук балаһыанньаҕа киирбит дьоҥҥо социальнай тус арыаллааһын оҥоһуллуохтаах. Иккиһинэн, 2022 с. тэҥнээтэххэ, дьон хамнаһа 1,2 төгүл үрдүөхтээх. Үсүһүнэн, дьарыктаах дьон ахсаана элбээн, 530 000 тиийиэхтээх.
Ону таһынан, урбаан уонна тыа хаһаайыстыбатын салаатыгар социальнай хантыраак көдьүүһэ үрдээн, ону туһаммыт дьон 70% итэҕэһэ суох дохуоттара чахчы эбиллиэхтээх. Кыра уонна орто урбаан салаатыгар үлэлиир дьон ахсаана 150 000 диэри тиийиэхтээх, социальнай урбаан түөрт төгүл үрдүөхтээх. Сааһырбыт, эбэтэр доруобуйатын туругунан кыайан үп-харчы кырыымчыгыттан тахсыбат дьоҥҥо көмө оҥоһуллуохтаах.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
