Экэниэмикэ

Мунньаҕы Ил Түмэн тутууга, дьиэ-уот коммунальнай хаһаайыстыбатыгар уонна энергетикаҕа сис кэмитиэтин бэрэссэдээтэлэ Яков Ефимов салайан ыытта. Сүрүн дакылааты дьиэ-уот коммунальнай хаһаайыстыбатын уонна энергетикатын миниистирин солбуйааччы Виктор Романов оҥордо. Кини бэлиэтииринэн, энергияны кэмчилээһин сокуона 2013 сыллаахха ылыллыаҕыттан бүддьүөт эйгэтин эбийиэктэригэр энергосервиһи киллэрии тэтимнээхтик ыытыллыбыта. “Олорор дьиэ пуондатыгар энергияны кэмчилээһини сайыннарыы уонна энергия көдьүүһүн үрдэтии сокуонунан сүрүннэнэрэ эрэйиллэр буолла. Тоҕо диэтэххэ, өрөспүүбүлүкэҕэ коммунальнай өҥөлөргө чэпчэтиилээх тарыыптары олохтооһун уонна судаарыстыба бүддьүөтүттэн тарыыптар арыттаһыыларын субсидиялааһын түмүгэр ресурсанан хааччыйар тэрилтэлэр үп киллэринэр сорох өлүүлэрэ ити субсидияттан турарынан, дохуоту ситэ ылбаттар”, -- диир миниистири солбуйааччы.

Толору кээмэйтэн субсидия ылар өлүүтэ, ортотунан , 70 бырыһыан, нэһилиэнньэ 30 бырыһыанын кэриҥин төлүүр. Маныаха бүддьүөттэн коммунальнай комплекс тэрилтэлэригэр анаан көрүллэр субсидия кээмэйэ сыл аайы үрдээн иһэр: өскөтүн 2015 сыллаахха 15 млрд. солк. эбит буоллаҕына, 2019 сылга 23 млрд. солк. тиийбитэ.

В.Романов сокуон барыла Ил Дархан сорудаҕынан оҥоһуллубутун, бу сокуону ылыныы энергосервис хампаанньалара олорор дьиэ пуондатын эбийиэктэригэр үлэлииллэрин көҕүлүөҕүн эттэ. “Сокуон барылын оҥоруу сүрүн сыала – быраап базатын оҥорон, өрөспүүбүлүкэ энергосервис хампаанньалара элбэх кыбартыыралаах дьиэлэргэ оҥорбут өҥөлөрүн төлүүргэ эбэһээтэлистибэ ылынарын ситиһии. Ол эбэтэр коммунальнай комплекс тэрилтэлэрин сэргэ энергосервис хампаанньаларынан сирэйдээн субсидя ылааччылар баар буолуохтара”, -- диир кини уонна субсидияҕа эбии үп көрүллэрэ эрэйиллибэтин, субсидия кэмчилэммит үп суотугар төлөнүөҕүн эттэ. Миниистири солбуйааччы бэлиэтииринэн, олорор дьиэ пуондатын эбийиэктэригэр энергияны кэмчилиир дьаһаллары ыытыыга тастан үбү тардыы энергетика ресурсаларын туһаныы намтыырыгар тиэрдиэҕэ, бастатан, ол итиинэн хааччыйыыга биллиэҕэ. Элбэх кыбартыыралаах дьиэлэргэ энергия көдьүүһүн үрдэтиигэ туһаайыллар үлэ хапытаалынай өрөмүөн ыытылларын аҕыйатыан уонна өрөмүөн болдьоҕун кылгатыан сөп. Энергетика ресурсаларын туһаныы намтааһына коммунальнай комплекс тэрилтэлэригэр анаан көрүллэр бүддьүөт ороскуота кыччыырыгар тиэрдиэҕэ. Холобур, Уус Алдан Бороҕонугар биир дьиэҕэ энергияны кэмчилиир дьаһаллары ыыппыттарын кэннэ итиинэн хааччыйыы иһин төлөбүргэ 25 бырыһыан кэмчилээбиттэр. Бүддьүөт үбэ чычырбас түбэлтэтигэр инвестор тастан үп тардан, туһанааччылар эбийиэктэригэр ороскуоту намтатар үлэни ыытар. Бүддьүөт эйгэтин тэрилтэлэрин эбийиэктэригэр ити ньыма сайдан, кэлиҥҥи сылларга 2 млрд. солк. кэриҥэ үп кэмчилэннэ.

Ил Түмэн дьокутаата Алиш Мамедов энергосервис хампаанньаларыгар хас киһи үлэлиирин, сокуон барыла олоххо киирдэҕинэ хампаанньаларга төһө кээмэйдээх субсидия бэриллиэҕин чуолкайдаста. Иккис дьокутаат Иван Данилов энергетика көдьүүһүн үрдэтэр үлэни тарыыптары көрүүттэн саҕалыырга эттэ. “Теплоэнергосервис” АУо генеральнай дириэктэрэ Максим Трофимов уонна “Теплэнергия” АУо генеральнай дириэктэрин бастакы солбуйааччы Александр Григорьев сокуон барылын олоххо киллэрии энергияны оҥорон таһаарааччыларга хоромньулаах буолуоҕуттан дьиксинэллэрин биллэрдилэр. Оттон “Сахаэнерго” АУо генеральнай дириэктэрэ Гаврил Алексеев Депутатскайга энергосервиһи киллэрбит уопуттара табыллыбытын кэпсээтэ, ол гынан баран, ресурсанан хааччыйар тэрилтэлэр энергосервиһи киллэрэргэ элбэх үбү угаллара эрэйиллэрин эттэ.

Сис кэмитиэт бэрэссэдээтэлэ Яков Ефимов түмүк тылыгар өрөспүүбүлүкэҕэ энергосервиһи киллэрии тоҕоостооҕун бэлиэтээн туран, сокуон барылын чочуйарга уонна этиилэри киллэрэргэ өссө даҕаны бириэмэ баарынан, кэмитиэт аатыгар ыйытыылары, этиилэри киллэрэллэригэр ыҥырда.