Хатыҥнары босхолообут дьонтон биирдэстэрэ Анатолий Макаров төлөпүөнүн нүөмэрин булан кэпсэттибит. «Чурапчы улууһун Одьулуун сиригэр-уотугар Мындыры диэн алааска үүнэн турар хатыҥнары тимир ытарчаттан быһаатыбыт. Мин Чурапчытааҕы кэллиэскэ видео, фотостудия куруһуогун биэрэбин, хаартыскаҕа айылҕаны түһэриинэн дьарыктаммытым 6-7 сыл буолла. Одьулуун олохтоохторо туох интэриэһинэй баарын эттэхтэринэ, тиийэн хаартыскаҕа түһэрэн үйэтитээччибин. Бу сырыыга Николай Климов ити хатыҥнары эппитигэр, тиийэн хаартыскаҕа түһэрэн баран, инстаграмҥа уонна фейсбукка таһаарбытым. Дьон тута көрөн сэргээбиттэрэ, кэмэнтээрий суруйбуттара. Арай, Чурапчытааҕы оскуола-интэринээтиттэн Александр Рожин уонна Михаил Тарасов төлөпүөммэр эрийэн, хатыҥнары тимир ытарчаттан босхолуохтарын баҕаралларын иһитиннэрбиттэрэ. Эрдэттэн сөбүлэһэн баран, бэҕэһээ тиийэн босхолоотубут. Мындыры алаас халдьаайытын анныгар «ЗИЛ” массыына көлүөһэтин диискэтэ хаалбытыгар, хайаҕастарын быыстарынан үс хатыҥ үүнэн тахсыбыт.
Александр Рожин, Чурапчытааҕы спортивнай оскуола завхоһа:
- Хаартыскалары көрөн баран, хатыҥнары тимир ытарчаттан хайаан да босхолоотоххо сатаныыһы диэн санаа киирбитэ. Интэринээт-оскуола суоппара Михаил Тарасовтыын анаан-минээн оҥостон баран, Чурапчыттан туруммуппут. Анатолий Макаровтыын Дириҥниир уонна Одьулууннуур суол икки ардыгар көрсүбүппүт, салгыы сирдээн биэрбитэ.
Бу үтүө дьыаланы оҥорбуттарын Саха сирин үгүс олохтооҕо олус астына иһиттэ уонна «Дьэ маладьыас уолаттар эбит. Сорук оҥостон тиийэн үтүө дьыаланы оҥорбуттар» диэн ис хоһоонноох кэмэнтээрийдэри суруйбуттар. Санатар буоллахха, бэс ыйын 5 күнүгэр аан дойдутааҕы тулалыыр эйгэ уонна Арассыыйа үрдүнэн эколог күннэрэ бэлиэтэнэллэр.
-
0
-
0
-
0
-
0
-
0
-
0
