Өскөтүн ньургуһун күүстээх санааны туоһулуур буоллаҕына, сардаана -- кэрэҕэ тардыһыы бэлиэтэ. Номоххо кэпсэнэринэн, сири айбыт Таҥара, дьолу дьоҥҥо биэрдин диэн, аалай уоту ыспыт. Онтуката сардаана буолан тыллыбыт.
Биһиэхэ үүнэр сардаана научнай аата “лилия даурская (Lilium pensylvanicum) диэн. 2000 сылтан Саха сирин Кыһыл кинигэтигэр сүтэн эрэр көрүҥ быһыытынан киирбитэ.
Бу пенсильванскай сардаананы сэргэ, өссө “кудреватая саранка” диэн эмиэ үүнэр эбит. Манна даҕатан эттэххэ, нууччалар лилиялары “саранка” дииллэрэ биһиги “сардаана” диэн тылбытыттан тахсыбыт.
Быйыл сардаана Амма уонна Өлүөнэ кытылларыгар кыыһар гына дэлэйдик үүммүт. Ол эрээри ону үргүүр, тэпсэр сиэрэ суох быһыы буоларын таһынан, өссө сокуонунан накаастанар. Саха Өрөспүүбүлүкэтин КоАП 4.5. ыстатыйатынан 1500-5000 солкуобайга ыстарааптаныахха сөп.
Кылгас сайыммыт киэргэлин, үөрүүнү бэлэхтиир сибэккибитин – сардаананы – харыстыаххайыҥ.
-
0
-
0
-
0
-
0
-
0
-
0
