Коронавируска ыалдьыбыт киһи ахсаана Бүлүү куоратыгар уонна Кыһыл Сыыр бөһүөлэгэр ордук улахан. Тыа нэһилиэктэригэр ыалдьааччы ахсаана эмиэ кырата суох. Билигин бу ыарыы тиийбэтэх нэһилиэгэ да суох буолла. Ордук кэбэҕэстик вакцинаны ылбатах уонна саастаах дьон түргэнник ыалдьар.
Улуустааҕы суһал штаб бу ыарыыны утары нэһилиэнньэ маассабайдык харыстанарыгар биир сөптөөх суол баарын тутуһан, вакцинаны ылыыга күүстээх өйдөтөр үлэни ыытар.
Ааспыт бээтинсэҕэ буолбут улуустааҕы суһал штаб уочараттаах мунньаҕар улуус баһылыга Сергей Винокуров нэһилиэнньэ коронавируһу утары быһыыны ылыытын көҕүлээн, нэһилиэктэр дьаһалталарыгар харчынан бириэмийэни олохтоото уонна бастакынан үрдүк көрдөрүүнү ситиспит үс нэһилиэк: Бороҕон (баһылык Андрей Иванов), Үгүлээт (баһылык Октябрь Лукин) уонна Хаҕын (баһылык Роман Софронов) дьаһалталарыгар 300 000 солк. суумалаах сертификаттары туттарда.
Бу курдук сэтинньи 30 күнүгэр диэри нэһилиэнньэ 80 бырыһыана быһыыны ыларын ситиспит нэһилиэктэр дьаһалталара коронавируһу утары үлэҕэ туттарга аналлаах 300 тыһыынча солкуобайдаах харчынан көмөнү ылыахтара диэн Бүлүүттэн биһиги уопсастыбаннай кэрэспэдьиэммит Андрей Яковлев-Чуос иһитиннэрэр.
-
0
-
0
-
0
-
0
-
0
-
0
