Сенатор «Парламент хаһыатыгар» быһаарбытынан, РФ Президенин муус устар 15 күнүнээҕи сорудахтарын кэрискэтигэр сөп түбэһиннэрэн, саҥа коронавирус ыарыылаах дьоҥҥо медицинскэй көмөнү оҥорууну кытта быһаччы сибээстээх үлэлээх медиктэргэ үлэ ураты усулуобуйаларын иһин 2020 сыл муус устарыттан бэс ыйын 30 күнүгэр диэри федеральнай бүддьүөттэн көҕүлүүр төлөбүрдэргэ анаан үп анаммыта. COVID-19 сутуллубут Россия олохтоохторо эмтэнэр стационардарыгар үлэлиир быраастары, орто уонна аччыгый медицинскэй персоналы таһынан, итинник төлөбүрдэр “суһал көмө” медиктэригэр, ол иһигэр суоппардарга эмиэ ананаллар.
Сокуон быһыытынан, итинник стационардар быраастарыгар бүгүн эбии төлөбүр 80 тыһ. солк., орто медицинскэй персоналга — 50 тыһ. солк., аччыгый медицинскэй персоналга — 25 тыһ. Суһал медицинскэй көмөнү оҥорор тэрилтэлэргэ, салааларга, РФ Президенин сорудаҕар сөп түбэһиннэрэн, быраастар эбии 50 тыһ. солк. ылыахтаахтар, орто уонна аччыгый медперсонал, ону сэргэ суһал көмө массыыналарын суоппардара — 25-тии тыһ. солк.
Маныаха муус устар 22 күнүнээҕи Федеральнай сокуонунан медицинскэй үлэһиттэргэ эрэ көҕүлүүр төлөбүрдэр физическэй сирэйдэр дохуоттарыгар нолуоктан (НДФЛ) босхолоноллор. Онон суһал көмө суоппардара кинилэргэ нолуок түһүүтүттэн босхоломмокко хаалбыттара.
Андрей Кутепов ити итэҕэһи туоратарга уонна суһал көмө суоппардарыгар үлэлэрин ураты усулуобуйатын иһин хамнастарыгар ааҕыллар федеральнай эбии төлөбүрдэри НДФЛ-тан босхолуурга этии оҥорор.
Ааспыт бэнидиэнньиккэ Россия президенэ Владимир Путин регионнар баһылыктарыгар туһаайан, ыам ыйын 15 күнүгэр диэри медицинскэй үлэһиттэргэ уонна суһал көмө суоппардарыгар барыларыгар муус устардааҕы көҕүлүүр төлөбүрдэри төлүүллэригэр соруйбута. Киниэхэ баар иһитиннэриигэ олоҕуран, ыам ыйын 9 күнүгэр диэри барыта 56 тыһ. киһи – ирдэниллэртэн икки төгүл аҕыйах киһи төлөбүрү ылбытын бэлиэтээбитэ. Маныаха муус устарга төлөнүөхтээх харчы регионнарга номнуо киирбит. Судаарыстыба баһылыга Доруобуйа харыстабылын министиэристибэтэ балаһыанньаны мэлдьи кэтээн көрөрүгэр сорук туруорбута итиэннэ хас биирдии региоҥҥа харчы дьоҥҥо тиийиитин тус бэйэтэ бэрэбиэркэлиэх буолан эрэннэрбитэ.
Ити иннинэ ыам ыйын 6 күнүгэр Владимир Путин коронавируһу утары охсуһар быраастарга эбии страховой мэктиэлэри оҥоруу туһунан ыйаахха илии баттаабыта. Ол докумуоҥҥа медицинскэй үлэһит олохтон барар түгэнигэр биир кэмнээх 2,7 мөл.солк. төлөнүөхтээҕин туһунан этиллэр. Биир кэмнээх страховой төлөбүр быһыытынан эбии мэктиэлэри коронавирус ыарыылаах дьону кытта үлэлиир быраастар, орто уонна аччыгый медперсонал, суһал көмө суоппардара, ыарыһахтары кытта быһаччы үлэлиир дьон ылаллар.
Эмиэ ити күн Госдума доруобуйа харыстабылыгар кэмитиэтин чилиэнэ Александр Петров («Биир ньыгыл Россия») COVID-19 ыарыылаахтары кытта үлэлиир медиктэри судаарыстыбаннай наҕараадаларга түһэрэргэ уонна олохтон барбыт быраастар ааттарын үйэтитэргэ этии киллэрбитэ. Доруобуйа харыстабылын миниистирэ Михаил Мурашко ити боппуруоска үлэлииргэ эрэннэрбитэ.
Ыам ыйын 12 к. дааннайдарынан, Россияҕа коронавирус ыарыылаах 232243 киһи баар, 43512 киһи үтүөрбүт, 2116 пациент олоҕо быстыбыт.
Саха сиригэр эмчиттэргэ эбии төлөбүрдэр
Ил Дархан Айсен Николаев кулун тутар 29 күнүгэр илии баттаабыт дьаһалынан, коронавирус ыарыыта булуллубут, сыстар кутталлаах гражданнарга медицинскэй көмөнү оҥорор судаарыстыбаннай, автономнай бүддьүөт тэрилтэлэрин үлэһиттэригэр уонна обсерватордарга үлэҕэ тардыллыбыт дьоҥҥо көҕүлүүр төлөбүрдэр олохтоммуттара.
Үлэ ураты усулуобуйаларын уонна эбии ноҕурууска иһин маннык көҕүлүүр төлөбүрдэр олохтоммуттара:
— быраастарга — 66 тыһ. солк.;
— орто медицинскэй персоналга — 40 тыһ. солк.;
— аччыгый медицинскэй персоналга — 20 тыһ. солк.;
— атын үлэһиттэргэ — 20 тыһ. солк.
Бу көҕүлүүр төлөбүрдэр оройуоннааҕы коэффициены (1,7) уонна ураты климат усулуобуйаларыгар үлэ иһин эбии бырыһыаннары (80%) учуоттаан ыйыллаллар уонна 2020 сыл кулун тутар 17 күнүттэн саҥа коронавирус сыстыганнаах ыарыыта тарҕаныытын режимэ тохтотуллуор диэри үлэ кэмигэр тэҥнэнэн хамнаһы кытта ааҕыллаллар.
-
0
-
0
-
0
-
0
-
0
-
0
