Быйыл 18 оскуоланы, 2 уһуйааны уонна 3 орто анал үөрэхтээһин тэрилтэтин хапытаалынайдык өрөмүөннээтилэр. 2026 сылга 6 оскуоланы, 6 уһуйааны уонна 3 орто үөрэх тэрилтэтин өрөмүөннүүр былааннаахтар. Өрөмүөн үлэлэрэ дойду бэрэсидьиэнэ Владимир Путин дьаһалынан ыытыллар. Оҕолор, ыччат үөрэнэллэригэр табыгастаах усулуобуйаны тэрийэр уонна куттала суох буолууну хааччыйар сыаллаах.
2022-2024 сылларга өрөспүүбүлүкэ үрдүнэн уопсайа 102 орто уопсай үөрэхтээһин тэрилтэтэ өрөмүөннэннэ. Манна 6,75 млрд солкуобайы үбүлээтилэр. Чопчулаан эттэххэ, 71 эбийиэк тыа сиригэр, 24 аартыка улууһугар бааллар. Бу өрөмүөн үлэлэрин түмүктэринэн 41 тыһ. үөрэнээччи аныгы ирдэбиллэргэ эппиэттиир, анал тэриллэринэн хааччыллыбыт тупсаҕай дьиэҕэ үөрэнэр кыахтанна.
Дойду бэрэсидьиэнин дьаһалынан бырагыраама өссө кэҥээтэ. Быйыл хапытаалынай өрөмүөн оскуолаларга эрэ буолбакка, уһуйааннарга уонна орто үөрэх кыһаларыгар эмиэ ыытылынна. Санатан эттэххэ, бу сылга Горнай, Амма уһуйааннарын уонна 3 орто үөрэх тэрилтэтин (Дьокуускайдааҕы педагогическай колледжы, Дьокуускайдааҕы тыа хаһаайыстыбатын техникумун икки филиалын) саҥардыннылар.
2026-2027 сс. былаан бигэргэннэ. Ол курдук, 2026 сылга 6 оскуоланы (биэһэ – икки сыллаах үлэ), 6 уһуйааны уонна 3 орто анал үөрэх тэрилтэтин өрөмүөннүөхтэрэ. 2027 сылга 12 оскуолаҕа, 6 уһуйааҥҥа уонна 2 орто үөрэх тэрилтэтигэр хапытаалынай өрөмүөн барыаҕа.
"Вести Саха" хаартыската.
-
0
-
0
-
0
-
0
-
0
-
0
