Этническай састаабы интэриэһиргээтэххэ, 2020 с. биэрэпис быһыытынан, баһыйар өттө саха 59,2 %, нуучча – 26,4 %, оттон эбэҥкилэр, киргиистэр, таджиктар, узбектар, кытайдар 3,4-0,6 %-ы ылаллар.
Тутуу кээмэйинэн, дьон олорор дьиэтин тутууга Саха Сирэ Уһук Илиҥҥэ 2-с миэстэни ылар. 2025 с. түмүгүнэн, тутууга 263,5 млрд. солк. суумалаах үлэ оҥоһуллубут. Өрөспүүбүлүкэҕэ бастакы ырыынакка биир кв. м. орто сыаната 2025 с. сэтинньитигэр 178,8 тыһ. солк., иккис ырыынакка 133,4 тыһ. солк. тиийдэ. Саҥа тутулла турар дьиэҕэ 1 хостоох кыбартыыра 7-8 мөл. солк. буолла, ол өрөмүөнүгэр өссө 1-2 мөл. солк. угуоххун наада. Иккис ырыынакка дьиэ сыаната арыый чэпчэки: 1 хостоох кыбартыыра 5-6 мөл. солк., ол эрээри, ипэтиэкэ сүрүн ыстаапката 22-24 %.
Дьокуускайга дьиэ сыаната төһө даҕаны хас да төгүл ыараатар, 35-игэр диэри саастаах эдэр дьоҥҥо, дьиэ кэргэҥҥэ, быраастарга, учууталларга, АБДь кыттыылаахтарыгар ипэтиэкэ 1-2 % буолан, түргэнник атыыга барар.
2025 с. түмүгүнэн, өрөспүүбүлүкэҕэ 804,8 тыһ. кв.м. дьиэ тутулунна, 2024 с. 752,4 тыһ. кв.м. дьиэ тутуллубута. Саха Сирин устуоруйатыгар өссө бачча элбэх дьиэ тутулла илик этэ. Кэлэр сылларга тутуу тэтимин ыһыктыбакка, саҥа түөлбэлэр, элбэх этээстээх дьиэлэр салгыы тутуллан иһиэхтэрэ. 2026 с. 806 тыһ. кв.м. иэннээх дьиэни тутар сорук турарын туһунан Тутуу миниистирэ Виктор Романов иһитиннэрбитэ.
Маннык уһулуччу көрдөрүүнү ситиһэргэ судаарыстыба көмөтө сүрүн тирэх буолар, чуолаан, чэпчэтиилээх ипиэтиэкэ, хаарбах дьиэттэн көһүү бырагыраамата. 2030 с. диэри 832 тыһ. кв. м иэннээх дьиэни тутуу тэтимин ыһыктыа суохтаах.
Миниистир Виктор Романов этэринэн, ааспыт сылга 344 тыһ. кв.м. иэннээх элбэх кыбартыыралаах дьиэ тутулунна, 2024 с. кытта тэҥнээтэххэ, 4 %-ынан үрдүк. Кэтэх дьиэни тутуу көрдөрүүтэ эмиэ үчүгэй, 450 тыһ. кв.м. иэннээх чааһынай дьиэ тутуллан, элбэх ыаллар киэҥ-куоҥ дьиэлэннилэр. Кэнники кэмҥэ уһаайбалаах чааһынай дьиэни тутуу элбээн иһэр. Итиниэхэ эмиэ чэпчэтиилээх ипэтиэкэ тирэх буолар.
Ааптар хаартыскаҕа түһэриитэ.
-
0
-
0
-
0
-
0
-
0
-
0
