– Федеральнай уонна эрэгийиэн суолталаах, массыына суолларын итиэннэ муосталары тутуу өрөспүүбүлүкэ дьонун олоҕун хаачыстыбатын биллэрдик тупсарыа, экэниэмикэ уонна бырамыысыланнас сайдыытын түргэтэтэр кыаҕы биэриэҕэ, биисинэскэ саҥа кыахтары арыйыаҕа, – диэн Айсен Николаев бэлиэтиир.
Санатан эттэххэ, Дьокуускайга суолу оҥорооччулар былааннарын өссө алтынньыга толорбуттара. Оттон эрэгийиэннээҕи суолларга 207,22 км оҥоһуллубута, бу сыл бүтүөр диэри өссө 13,86 км оҥоһуллуохтаах. Дьокуускай куорат иһигэр бөдөҥ эбийиэктэргэ үлэ бүттэ, куораты иилии эргийэр шоссе хапытаалынайдык өрөмүөннэннэ, Эргэ Покровскайдыыр суол, Иван Кульбертинов аатынан уулусса итиэннэ куорат таһынааҕы Табаҕа, Тулагы бөһүөлэктэригэр элбэх оҕолоох ыаллар кыбаарталларыгар тиэрдэр суоллар оҥоһулуннулар. Дьокуускай куорат хорук тымырын, Ленин проспегын, өрөмүөнэ саҕаланна, бу үлэ үс түһүмэҕинэн ыытыллан, 2023 сылга түмүктэниэхтээх. Намныыр суол «Сыырдаах-Тулагы» учаастагар 4,16 км усталаах суол уонна Аппааныттан Хатырыкка диэри 18,5 км суол аспаалынан бүрүлүннүлэр. «Умнас» суолга 20,50 км, Хатас суолугар 4,87 км аспаалланнылар. Ону таһынан, «Амма», «Анаабыр», «Дьааҥы», «Мүрү», «Бөтүҥ», «Уолба-Булуҥ», «Харбалаах», «Өймөкөөн» массыына суолларыгар эмиэ аспаал уурулунна. Өрүстэри, үрэхтэри туоруур муосталарга улахан үлэ ыытылынна – Уус Майа оройуонугар Ааллаах Үүн, Томпоҕо Мөҥкүлэ, Ленскэйгэ Ньүүйэ үрэхтэрин туоруур муосталар оҥоһулуннулар. Бу туһунан Ил Дархан уонна Бырабыыталыстыба пресс-сулууспата иһитиннэрэр.
-
0
-
0
-
0
-
0
-
0
-
0
