Тутуу

Бэдэрээдинэй тэрилтэ сүрүн дириэктэрэ Андрей Данилов – бу сыл түмүктэниэр диэри, биэс дьиэ көҥдөйүн бүтэрэр соруктаахтарын туһунан иһитиннэрэр.

Биллэн турар иннибитигэр олус элбэх үлэ күүтэр. Бу алыҥ оройуон тутуута барар сиригэр, эрдэ оҥорон таһаарар бааза турбута. Сирэ-уота эриэ-дэхси, күөрэ-лаҥкы бүтүннүү кута этэ. Күһүн, кумах буор кутан, сирин тэҥнээһин үлэтин ыыппыппыт.

Кэлэр сыл балаҕан ыйыгар дылы, манна олус сиэдэрэй, тупсаҕай тутуулаах алыҥ оройуон баар буолуоҕа – диэн, Андрей Данилов былаанын үллэстэр.

СӨ Бырабыыталыстыбатын биирдиилээн дьиэни-уоту тутууга бэрэссэдээтэлин солбуйааччыта Кирилл Бычков бэлиэтээбитинэн, үлэ күүстээх тэтимэ хара-маҥнайгыттан саҕаланар.

Тутуу үлэтэ барыта түмүктэммитин кэннэ, үчүгэй суол оҥоһуллан, о.э. киирэргэ-тахсарга табыгастаах сырыы баар буолуоҕа. Куорат кииниттэн тэйиччи буолан, бу сир тыаһа-ууһа, сүпсүлгэнэ суох сынньалаҥ соҕус дойду буолуохтаах.

Бу бырагыраама Өрөспүүбүлүкэбит Ил Дархана Айсен Николаев дьаһалларыгар олоҕуран сайдар. Бырайыакпытын федеральнай ипотека бырагыраамата өйүүр буолан, чэпчэтиилээх 7% ИЖС ипотекатынан кредит ылан, чааһынай дьиэ туттарыахха сөп.

Ити барыгыраамабыт биир сүрүн үтүө өрүтэ. Тоҕо диэтэргин билигин чааһынай дьиэлэниэн баҕарар дьон ахсаана элбээн иһэр.

Бу оройуоҥҥа тутуллар дьиэлэр олус тупсаҕай буолуохтара. Уопсай иэннэрэ 90-тан 100 кв.м. диэри тэҥнэһиэхтэрэ. Аны сыаната эмиэ табыгастаах уонна аныгы МХМ тутар көрүҥүнэн (МХМ технология – салгыны биир тэҥник тутар, хиимия эҥин туттуллубат ол түмүгэр аллергиктарга доруобуйаларыгар охсубат уонна түргэнник тутуллар) барыаҕа.  

            Эһиилиги сыл бүтүөр диэри 32 дьиэни кыайа-хото тутуохтара диэн, тутар хампаанньабытыгар бигэ эрэллэхпит – диэн, Кирилл Бычков санаатын этэр.

            yakutia-daily.ru ханаал суруйарынан, саҥа дьиэлэр атыылара саҕаламмыт. Маны таһынан бу бырайыакка дьиэ туттарааччы этии киллэрэн, бэйэтин баҕатынан туттарар дьиэтигэр уларытыы ирдээн, быһыытыгар-таһаатыгар дьайар кыахтанар эбит.

Бу өттүгэр биһиги хас биирдии атыылаһааччыбытын кытары сирэй кэпсэтэн, кини санаатын истэн, дьиэ тутуутугар, этээһин оҥоһуутугар уларытыы киллэрэр кыахтаахпыт, - диэн, “РИА” дириэктэрэ Владимир Трегубов иһитиннэрбит.

Бу дьиэлэри барытын эппиппит курдук ниэмэс омугун аныгы МХМ технологиятынан тутуохтара. Бу аныгы технология биһиги өрөспүүбүлүкэбитигэр бэйэтин үчүгэйдик сыаналатта. МХМ-холбоһуктарга сүрүннээн тиит уонна иннньэлээх мастары (харыйа, бэс) тутталлар. Буруус мастан туох да итэҕэһэ суох диэн ааттыыллар.

Барыта бу учаастакка уопсайа 2,9 тыһ.кв.м. иэннээх 32 дьиэ тутуллара былааннанар.

Маны таһынан, бу аттаммыт бырайыак чэрчитинэн, маннык оройуон Бүлүү аартыгар тутуллара күүтүллэр. Ол оройуоҥҥа 47 дьиэ дьэндэйиэҕэ.