– Оту тиэйиигэ кэккэ улуустарга уустуктар бааллар. Уус Алдаҥҥа ааспыт нэдиэлэҕэ сылдьыбытым, билигин онно ревизия ыытыллар, өрөспүүбүлүкэ иһиттэн от көрдүүллэр. Оту тиэйии-таһыы ороскуотун толуйууга 500 мөл. солк көрүлүннэ.
Салааны өйөөһүҥҥэ иллэрээ сыл 2,8 млрд солк. көрүллүбүт буоллаҕына, былырыын 4 млрд буолбута, ол иһигэр саҥа мэхэньиисиминэн үүт туттарбат ыаллар харчы ылбыттара, ити улахан өйөбүл буолар.
Өрөспүүбүлүкэ салалтата кириисиһи утары дьаһаллар былааннарын оҥордо, онно баан кирэдьиитин бырыһыанын ыстаапкатын толуйуу курдук өйөбүл көрүҥнэрэ эмиэ киллэрилиннилэр.
Соҕотуопкалыыр тэрилтэлэр этиилэрэ өйөнөн, быйыл үүтү туттарыы былаана 6000 туоннаҕа тиэрдилиннэ, ол харчытын 50 %-а улуустарга ыытылынна. Оттон «төбө харчыга», сылгы субсидията уонна ыһыы, оттооһун үлэлэрин тэрийиигэ көрүллэр харчы бу ый бүтүүтүгэр-муус устар саҕаланыытыгар барыаҕа. Ити курдук үлэни-хамнаһы кэмигэр тэрийэргэ тирэх буолар харчы урутатан ыытыллар.
Ас-үөл өттүнэн куттал суох буолуутун хааччыйар дьаһал чэрчитинэн, ходуһа уонна бааһына сирдэрин кэҥэтии ураты болҕомтоҕо ылыллыаҕа. Бырабыыталыстыба отчуоттарыгар хас улуус ахсын мелиорация үлэтин күүһүрдэргэ туруорсаллар. Ити эрээри, бастатан туран, дьиҥнээхтик үлэлиир-хамсыыр, ол эбэтэр сүөһүтүн-сылгытын ахсаанын элбэтэр, ыһыытын иэнин кэҥэтэр хаһаайыстыбалар уонна улуустар өйөнүөхтэрэ.
Кэлэр сайын эмиэ кураан буолар чинчилээҕинэн, «Өлүөнэ – Туора Күөл», «Өлүөнэ – Мүрү» ситиминэн ууну хачайдааһын кээмэйэ икки төгүл улаатыннарыллыаҕа.
Үүт соҕотуопкатын салаатыгар ороскуоттар баар буолуохтарын сөп, маныаха хас да хайысханан этиилэр бэлэмнэнэллэр. АПК пуондатын чэрчитинэн дьаһаллар ылыллыахтара. Биһиги чааһынай ыаллары кэтэх сүөһүлэрин элбэтэллэригэр күһэйэр кыахпыт суох, онон кэккэ мэхэньиисимнэринэн кинилэр сайдар усулуобуйаларын тэрийиэх тустаахпыт.
Ыаллыы эрэгийиэннэрбитигэр эмиэ уустук балаһыанньа үөскээтэ, Амурга, Забайкальеҕа сибиинньэ чумата, Бурятияҕа ящур ыарыылар турдулар, онон бэйэбит эрэ сирбитигэр оттуур соругу туруорунуохтаахпыт. Ол иһин көрүллүбүт үбү-харчыны урутатан эрдэ ыыттыбыт – сааскы ыһыы үлэтэ кэмигэр ыытылларын, сайын элбэх мобильнай биригээдэлэри тэрийэн, ыраах учаастактарынан оттуур туһугар.
Сиилэс, сенаж курдук сүөһү сүмэһиннээх аһылыгын биирдиилээн ыаллар бэлэмниир кыахтара суох, инньэ гынан кинилэр күүстэрин түмэллэрэ, кэпэрээссийэлэһэллэрэ ирдэнэр. Оччотугар эрэ сири оҥоруу, үп-харчы өттүнэн чэбдигирдии, о.д.а. бырагыраамаларыгар хабыллар, көрүллэр үпкэ тииһинэр кыахтаныахтара, -- диэтэ Михаил Викторович.
-
0
-
0
-
0
-
0
-
0
-
0
