Теплица үлэтин «Саюри» генеральнай дириэктэрэ Максим Гома, кылаабынай агроном-технолог Тимир Иванов билиһиннэрдилэр.
“Бу иннинэ нэһилиэнньэни сайын уонна күһүн эрэ оҕуруот аһынан хааччыйар эбит буоллахпытына, быйылгыттан кыһыҥҥы өттүгэр эмиэ үүннэрэр буоллубут. Маннык тыйыс климат усулуобуйатыгар оҕуруот аһын олордууга Аан дойдуга бу бастакы бырайыак буолар. “Саюри” үлэһиттэрэ экологическай оҕуруот аһынан нэһилиэнньэни хааччыйар туһугар кыһаллан туран үлэлииллэр”, — диэн тэрилтэ салайааччыта сэһэргээтэ.
“Саюри” биэс теплицалаах: салаат уонна рассада олордор онно күөх үүнээйи 14 көрүҥүн үүннэрэллэр, икки теплицаҕа огурсу үүнэр, икки теплицаҕа – помидор. Күөх үүнээйи икки нэдиэлэ устата тус-туспа иһиккэ үүнэрин, ууну автомат тэрилинэн куталларын, үлэһиттэр үксүлэрэ Тулагы Киллэм уонна Сыырдаах нэһилиэгин олохтоохторо буолалларын кылаабынай агроном Тимир Иванов кэпсээтэ.
Салгыы дьокутааттар огурсу уонна помидор үүнэр теплицаларын көрдүлэр. 2019 сылга 166 т. огурсуну, 43 т. томаты, 13 т. күөх үүнээйини хомуйбуттарын, ол сылга 0,1 га сиргэ 2016 сыллаахха тутуллубут соҕотох теплица эрэ үлэлээбитин иһитиннэрдилэр. Билигин биэс теплица 1,2 га сири хабар, бу теплицалар 2019 сыл муус устар ыйыгар үлэҕэ киирбиттэр. Эбии 2 га сиргэ теплица тутуллара былааннанар. Бастаан 4 теплицаны быйыл сайын киллэрэллэр, онтон 2021 сылга 1,2 га сиргэ 6 теплицаны тутуохтара. “Оччоҕо “Саюри” 3,3 га сиргэ оҕуруот аһын олордор буолуоҕа”, — диэн салайааччы кэпсээтэ.
Автоматическай уу кутуу туһунан туспа кэпсээн. Омук анал техниката ууну бырдаҥалатан кутар, онно бэйэтигэр уоҕурдууну кутан булкуйаллар эбит. “Саюри” – бу теплицэ комплекса эрэ буолбатах, бу – 50 кыраадыс тымныыга оҕуруот аһын олордор сүүнэ инновационнай хардыы”, — диэн Максим Гома киэн тутта бэлиэтээтэ.
Маны таһынан “Саюри” дьон доруобуйатыгар туһалыыр аналлаах социальнай хабааннаах бырайыагынан буолар. Теплица үүнүүтүн Дьокуускай куорат оҕо саадтарыгар кырачааннар аһылыктарыгар анаан биэрэллэр. Туоннанан оҕуруот астарын атыыга “Илин Эҥэр”, “Айгуль”, “Ферма”, “Поярков”, “Мясной двор” уонна да атын маҕаһыыннарга тиэрдэллэр. Максим Гома бэлиэтээбитинэн, “Саюри” коммерческай бырайыак быһыытынан 8 сыл иһигэр барыыска тахсар кыахтаах.
Норуот дьокутааттара оҕуруот аһын олордуу хаамыытын кытары билсэн баран, кэлэктииби кытары көрүстүлэр. Үлэ көрдөрүүтүн хайдах гынан өссө үрдүк таһымҥа таһаарар туһунан кэпсэттилэр. Ил Түмэн бэрэссэдээтэлин солбуйааччы Антонина Григорьева алын кылас оҕолорун итии аһылыгынан босхо хааччыйыы сүнньүнэн хаачыстыбаннай ас ирдэнэр буоларын туһунан эттэ. Инникитин “Саюри” сибиэһэй аһа оскуолаларга эмиэ тиксиэҕэр эрэлин эттэ.
Сардана Кузьмина
-
0
-
0
-
0
-
0
-
0
-
0
