Киирии тылыгар Ил Түмэн бэрэссэдээтэлэ Петр Гоголев олунньу 6 күнүгэр буолбут Госсовет киэҥ ыҥырыылаах мунньаҕар кадырдары бэлэмнээһин боппуруоһун тула кэпсэппиттэрин, онно Владимир Путин Федеральнай мунньахха Анал этиитигэр туруорбут соруктарын эбэн биэрбитин туһунан иһитиннэрдэ. Кини регион үрдүк үөрэх кыһаларын үлэлэригэр уларыйыылар күүтүллэллэрин, ол уларыйыылар наука практиканы кытары сибээһин күүһүрдэр туһуттан буоларын эттэ.
Петр Гоголев тыа хаһаайыстыбатын салаатыгар үлэһит ахсаана тиийбэт кыһалҕата сытыытык турарын туһунан санатта. “Ол аата Арассыыйа таһымыгар нормативнай докумуоннарга көннөрүү киллэрэр, чуолаан Саха өрөспүүбүлүкэтигэр исписэлиистэри уонна преподавателлэри бэлэмнээһин судаарыстыбаннай сакааһыгар көннөрүү киллэрэр тоҕоостоох”, — диэн бэлиэтээтэ. Маны таһынан кини үөрэх кыһатын бары таһымыгар, ол иһигэр агрооскуолаларга, орто анал, үрдүк үөрэх тэрилтэлэригэр үөрэтэр былааннарын үөрэх тиһигин быспат курдук хаттаан көрөр тоҕоостооҕун эттэ.
Дьокуускайдааҕы судаарыстыбаннай тыа хаһаайыстыбаннай академиятын ректора Иван Слепцов тыа хаһаайыстыбатын салаатыгар кадырдары бэлэмнээһин туһунан иһитиннэрии оҥордо. Былырыын 607 выпускник үөрэҕин бүтэрбит, академияттан көччөх буолан көппүт ыччат 75% идэлэринэн үлэ булар эбит. Кини ДьГТХА судаарыстыбаннай бүддьүөт үбүнэн тус сыаллаах исписэлиистэри бэлэмнээһиҥҥэ туруорсарын туһунан эттэ. Ол курдук, 2020 сылга академия 110 үөрэх миэстэтин туруорсар. Маны таһынан академия “Агростартабынан” бааһынай хаһаайыстыбаларга көмөлөһөр сыаллаах судаарыстыбаттан көмөҕө бэйэтин выпускниктарыгар квота көрдүүр. “Биһиги выпускниктарбыт грант быһыытынан көмө ыланнар, миэстэтигэр тиийэн бэйэлэрин дьыалаларын аһыахтаахтар. Саҥа саҕалыыр фермердэргэ бу улахан көҕүлээһининэн буолуо этэ”, — диэн Иван Слепцов бэлиэтээтэ.
Дьокуускайдааҕы тыа хаһаайыстыбатын техникумун дириэктэрэ Андрей Самсонов техникумҥа 1158 устудьуон үөрэнэрин, ол онтон аҥара агротехнолог хайысхалаах идэлэргэ үөрэнэрин кэпсээтэ. Выпускниктар 56% үлэ булалларын, оттон 33% үөрэхтэрин салгыы үрдэтэллэрин иһитиннэрдэ. Кини кэтэхтэн үөрэх миэстэтин үбүлээһини төнүннэрэр тоҕоостооҕун туһунан эттэ. “Кэтэхтэн тыа сириттэн кэлэн үөрэнэллэр, үптэрэ кырыымчык дьон”, — диэтэ.
Норуот дьокутааттара Мария Христофорова, Петр Аммосов, Виктор Губарев өрөспүүбүлүкэ тыа хаһаайыстыбатын салаатыгар кадырдары бэлэмнээһин сүнньүнэн санааларын атастастылар.
Ил Түмэн тыа сирин уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин көрсүһүүнү түмүктүүрүгэр Саха сирин агропромышленнай салаата сайдарыгар улахан кыах баарын, маныаха бары сомоҕолоһон үлэлиэхтээхпитин эттэ. Кини өрөспүүбүлүкэ уопсай нэһилиэнньэтиттэн 34% эрэ тыа сиригэр олорорун, сылын ахсын тыа сириттэн көһүү улаатарын бэлиэтээтэ. Ол аата тыа сиригэр квалификациялаах үлэһиттэр тиийбэт буолуохтарын сөп. Ол иһин тыа сиригэр үлэлиэн баҕалаах эдэр үлэһиттэри өйүүр араас бырагыраама баар буолуохтааҕын ыйда. Көрсүһүү кыттааччыларыгар бу кыһалҕаны быһаарар кэккэ этиилэрин көхтөөхтүк киллэрэллэригэр эттэ.
Ил Түмэн бэрэссэдээтэлэ Петр Гоголев тэрээһини түмүктүүрүгэр Ил Түмэн уонна аграрнай хайысхалаах үөрэх кыһалара бииргэ үлэлэһэллэрэ көдьүүстээх буолуоҕун ыйда. “Үөрэх тэрилтэлэриттэн чуолкай этиилэр киирэллэрэ дьокутааттар сокуон барылын бэлэмнииллэригэр туһалыа этэ, чуолаан тыа хаһаайыстыбатын салаатын үлэһиттэрин бэлэмнээһиҥҥэ туһуламмыт сокуоннары оҥорорго”, — диэтэ.
Бу тэрээһин чэрчитинэн ДьГТХА-га “Россельхозбанк” ААУо Саха сиринээҕи филиалын кылааһын үөрүүлээх аһыллыыта буолла. Ил Түмэн спикерэ Петр Гоголев, “Россельхозбанк” регионнааҕы филиалын дириэктэрэ, V-с ыҥырыылаах Ил Түмэн дьокутаата Василий Тимофеев уонна норуот дьокутаата, ДьГТХА ректора Иван Слепцов кытыннылар.
Сардаана КУЗЬМИНА
-
0
-
0
-
0
-
0
-
0
-
0
