Тыа сирин отчут-масчыт дьоно бу күннэргэ куйаас күннэри баттаһа ходуһаҕа күүрээннээхтик үлэлииллэр. Оттообот да дьон окко былдьаһыктаах күннэр үүммүттэрин билэр, «ходуһаҕа охтон да баран оккун үргүү сыт» диэн бэйэлэрин статустарыгар таһаараллар. Кырдьыга да уһун ардахтар кэннилэриттэн кэлбит кураан күннэргэ хойуутук үүммүт оту үлүмнэһэн оттоон отчуттар ходуһаттан сиик түспүтүн кэннэ тахсаллар.
Улуус үрдүнэн от ыйын 24 күнүн туругунан окко былаан 13 бырыһыан туолла. Ол иһигэр тэрээһиннээх хаһаайыстыбалар 1254 тоннаны бэлэмнээн былааннарын 15,6, бааһынайдар 1059 тоннаны кэбиһэн былааны 9,6 бырыһыан уонна кэтэх хаһаайыстыбалаахтар 1684 тонналанан, былааннарын 14, 5 бырыһыан толордулар. Ааспыт сыл бу кэмигэр 3777 га сир охсуллубут буоллаҕына, быйыл 6089 га сир охсуллан сытар. Улуус биир улахан Строд аатынан тэрээһиннээх хаһаайыстыбата быйылгы окко былаана 1545 тонна. Бу турар кураан күннэргэ хаһаайыстыба 3 звенота таһаарыылаахтык оттоон, 670 тонна хаачыстыбалаах оту бэлэмнээн былаанын 43 бырыһыан толордо. Хаһаайыстыба салайааччыта Василий Тимофеев “хата бэртээхэй күннэр тураннар, оттору ардахха былдьаппакка, үчүгэй хаачыстыбалаах оту бэлэмнээтибит. От үүнүүтэ үчүгэй. Онон былааны толорор инибит диэн саныыбыт” диэн этэр.
Синоптиктар бэлиэтииллэринэн сотору эмиэ ардахтар кэлиэхтэрэ. Атырдьах да ыйа эмиэ хадаҕалыах курдук. Онон турар кураан күннэри баттаһан оттоомохтоон хаалыахха.
“Амма олоҕо” хаһыат
-
2
-
0
-
0
-
0
-
0
-
0
