Саха Сирин дьокутаата тыл этиитигэр бу тэрээһин Арассыыйаҕа табаны иитиигэ уонна хотугу сир төрүт аҕыйах ахсааннах омуктарын былыр-былыргыттан харыстанан кэлбит дьарыктарын өйөөһүҥҥэ бэлиэ түгэнинэн буолар диэн бэлиэтээтэ.
-Владимир Якушев салалтатынан ыытыллар Федерация Сэбиэтин мунньаҕын ыытыы төрүт култуурунай нэһилиэстибэни харыстааһыҥҥа улахан өйөбүл буолар, ону ааһан норуот чөл туруктаах, көмүскэллээх буолуутугар уонна ыраах, уустук суоллаах-иистээх сирдэри баһылааһыҥҥа сүрүн оруолу ылар, -диэн Елена Христофоровна махталын биллэрдэ. Ону тэҥэ, Саха Сирин Ил Дарханын сүбэһитэ Александр Акимов көҕүлээһининэн “таба мэччийэр сирэ” диэн өйдөбүлү сокуон иһинэн көрөргө диэн этии киллэрбитин санатта. Бу курдук таба иитиитигэр судаарыстыба өртүттэн сокуонунан сүрүннээһин, бэрээдэктээһин наадатын тоһоҕолоон эттэ.
Мунньахха кыттыбыт сенатордар уонна эспиэрдэр билигин баар бырагыраамалар төһө да үлэлээбиттэрин иһин, хамнаһа кырата бэрдиттэн уонна үлэлиир, олорор усулуобуйата уһулуччу тыйыһынан ыччат табаһыт идэтигэр таласпатын бэлиэтээтилэр. Онон табаһыт хамнаһын уонна статуһун үрдэтэргэ туһуламмыт миэрэлэри ылар наадатын ыйдылар.
Мунньахха ону тэҥэ, өр кэмҥэ “салгыҥҥа ыйана” сылдьыбыт табаһыт дьахталлар үлэлэрин боппуруоһа быһааррыллыбытын билиннилэр. Ол курдук сенатордар Валентина Матвиенко уонна Галина Карелова көҕүлээһиннэринэн “көс олохтоох дьиэ үлэһитэ” диэн дуоһунас киллэрилиннэ (уруккута - “чуум үлэһитэ”). Билигин ону табаны иитэр хаһаайыстыбалар ыстааттарыгар киллэрэр сорук турар. Хотугу сир олхтоохторугар ураты суолталаах тэрээһин кыттыылаахтара таба иитиитин РФ Тыа хаһаайыстыбатын министиэристибэтин хайысхатынан страховкаланар салаалар кэрискэлэригэр киллэрэр туһунан этии киллэрдилэр. Ону тэҥэ, көс олох үөрэхтээһин чааһынан көс олохтоох оскуолалары өйүүргэ туһуламмыт миэрэлэри оҥорон таһаарарга диэн быһаарыы ылыннылар.
Салгыы хотугу таба иитиитин сайыннарыыга нуормалыыр бааза туругун уонна бу салааны салайыы хаачыстыбатын үрдэтии боппуруостарын көрдүлэр.Ол курдук технология өртүнэн кыаҕы улаатыннарарга анаан инбэстииссийэлэри тардар наадатын ыйдылар. Таба иитиитин көдьүүстээхтик сайыннарыы түмүгүнэн нэһилиэнньэ олоҕун хаачыстыбата үрдүөхтээҕин, каадырдары бэлэмнээһин быһаарыллыахтааҕын эттилэр. Бу этиилэр Федерация Сэбиэтин иһинэн Уһук Илин, Аартыка уонна Антарктида сайдыытын боппуруостарыгар Сэбиэккэ киллэрилиннилэр.
Түмүккэ Елена Голомарева: “Табаһыттар - былыргы үгэстэри, дьарыктары эрэ араҥаччылааччылар буолбатахтар. Кинилэр киэҥ куйаар хотугу сирдэри араҥаччылааччылар, кини улуу дуолун кыраҕатык кэтээн көрөр, харыстыыр дьон. Кинилэр үлэлэрэ судаарыстыба өртүттэн сөптөөх өйөбүлү ылыахтаах, олохторугар-дьаһахтарыгар болҕомто ууруллуохтаах. Билигин бу киирбит этиилэр чопчу сокуоннар уонна бырагыраамлар буолан тахсыахтаахтар. Федерация Сэбиэтэ бу боппуруоһу хонтуруолга ылыыта – хотугу норуоттар ханна да суох, хатыламмат үгэстэрдээх олохторо-дьаһахтара харыстааһыҥҥа олус улахан суолталаах хардыы. Бу биһигини үөрдэр, санаабытыгар эрэли биэрэр, күүспүтүгэр күүс угар”, - диэн эттэ.
Бу тэрээһиҥҥэ Арассыыйа Федерациятын сенатодардара, ситэриилээх былаас федеральнай уорганнарын, РФ субьектарын судаарыстыбаннай былаастарын, билим тэрилтэлэрин бэрэстэбиитэллэрэ уонна Сэбиэт чилиэннэрэ кыттыыны ыллылар.
Ил Түмэн пресс-сулууспата
Хаартыска Федерация Сэбиэтин саайтыттан
-
4
-
0
-
0
-
0
-
0
-
0
