Тамалакаан олохтооҕо Аскалон Иванов быйыл ыанньыктарын төбөлөрүгэр 35-тии тыһыынча солкуобайы ылла.
-- Сайын окко харчы наада. Онон түөрт ынахпын ыан, күҥҥэ 17-18 киилэ үүтү Ороһуга илдьэн туттарабын.
Быйыл Ороһу нэһилиэгэр саҥа тутуллубут үүт собуотугар урбаанньыт Светлана Сортолова чааһынай ыаллартан үүтү 30 солк. тутарга этии киллэрбитэ. Инньэ гынан, бу эҥээр бөһүөлэктэр –Балаҕаннаах, Нам, Тамалакаан, Ороһу, Харбалаах -- кэтэх хаһаайыстыбалаахтара бары үүттэрин манна туттаран, күн ахсын сибиэһэй үүт аһылык астанар буолла.
Дьулус Петров, технолог:
--Кефир, суорат, сүөгэй, өссө иэдьэгэй оҥоруохтаахпыт, -- диэн, бородууксуйатын билиһиннэрэр.
Улахан хаһаайыстыбалар эмиэ үүттэрин бу собуокка аҕалан туттараллар. Ону улуус киинигэр баар “Үөһээ Бүлүү” үүт астыыр биир кэлим хааччахтаммыт тэрилтэҕэ тиэрдэллэр. Бу тэрилтэ үүккэ былаана -- 2700 туонна.
Сергей Иванов, тыа хаһаайыстыбатын управлениетын начаалынньыга:
--Конкуренция диэн баар буолуохтаах. Оччоҕо эрэ сайдыы барар. Маннык үлэни, урбаанньыттар үүтү туталларын өйүүбүт. Саҥа механизм киирбитэ үчүгэй. Бастакы сылбыт, онон ымпыгын-чымпыгын, дьэ, билэн эрэбит. Онон эһиил бу механизмҥа сөп түбэһиннэрэн, саҥа ньымалары толкуйдуу сылдьабыт.
Василина Федотова, “Хотун Бүлүү”.
-
0
-
0
-
0
-
0
-
0
-
0
