Бүлүү бөлөх улуустарга от үүнүүтэ син ортоһуор буоллаҕына, илин эҥэрдэргэ балаһыанньа лаппа уустук. Бу күннэргэ Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы Михаил Никифоров былаан быһыытынан, Мэҥэ Хаҥалас улууһугар тахсан, от үүнүүтүн көрдө-иһиттэ. Кинини кытта Тыа хаһаайыстыбатын министиэристибэтин бородууксуйа ылыллар дьиэ кыылын иитиигэ департаменын салайааччыта Артем Александров, үүнээйини үүннэриигэ департаменын салайааччытын солбуйааччы Дмитрий Махаров уонна Ил Түмэн аграрнай бэлиитикэҕэ уонна тыа сиригэр сис кэмитиэтин бэрэссэдээтэлэ Андрей Находкин сылдьан, баар балаһыанньаны билистилэр.
Анал сырыы туһунан норуот дьокутаата Андрей Находкин: «Быйыл илин эҥэр улуустарга от үүнүүтэ мөлтөх. Ол чэрчитинэн, тыа хаһаайыстыбатыгар быһаччы эппиэттээх Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы Михаил Никифоровтыын Мэҥэ Хаҥалас улууһугар тахсан сырыттым. Бастаан хоту сытар нэһилиэктэртэн саҕалаан, Төҥүлүгэ, Тумулга сырыттыбыт. “Тумул” кэпэрэтиип бааһыналарын көрдүбүт. Салайааччы Таисия Десяткина. Итини тэҥэ, кэтэх дьон оттуур сирдэригэр эмиэ таарыйдыбыт. Дьэ, кырдьык, балаһыанньа уустугун көрөн итэҕэйдибит. Улууска былааннарыттан 8 тыһ. туонна тиийбэт туруктаах.
Ол эрээри, кэмигэр киирэн оттоотохторуна уонна мобильнай биригээдэлэр талахтаах, дулҕалаах, үрэхтээх сирдэргэ илии хотуурунан киирэн, үчүгэйдик үлэлээтэхтэринэ, балаһыанньаттан син тахсыахха сөп эбит диэн көрдүм. Ол эрээри, ити уустук соҕус боппуруос, билигин дьон илии хотууруттан тэйбитэ ыраатта. Бары тиэхиньикэҕэ убанныбыт. Михаил Никифоров салгыы Баатара, Хорообут, Догдо, Табаҕа, Бүтэйдээх нэһилиэктэригэр сылдьан, бааһынай хаһаайыстыбалар салайааччыларын кытта көрүстэ¸ от үүнүүтүн көрдө-иһиттэ. Салгыы Чурапчыга от үүнүүтүн билсэ барбыта. Маннык улуустарынан сылдьан, баар балаһыанньаны билсэр хайаан да наада», - диэн билиһиннэрдэ.
-
0
-
0
-
0
-
0
-
0
-
0
