Мунньахха кыттыыны Ил Түмэн сис кэмитиэтин чилиэннэрэ, урбаан, атыы-эргиэн уонна туризм, экэниэмикэ уонна үп министиэристибэлэрин бэрэстэбиитэллэрэ ыллыллар. Маны тэҥэ СӨ иһинэн үлэлиир Федеральнай нолуок сулууспатын Саха Сиринээҕи управлениетын үлэһиттэрэ уонна СӨ Ил Дарханын иһинэн үлэлиир урбааҥҥа Сүрүннүүр сэбиэт президиумун чилиэннэрэ кытыннылар.
Сис кэмитиэт бэрэссэдээтэлэ Игорь Григорьев мунньах аһыллыытыгар бэлиэтээбитинэн, 2022 сыл кулун тутар 30 күнүгэр РФ Бырабыыталыстыбатын 512-с нүөмэрдээх уурааҕа олоххо киирбит. Докумуоҥҥа нолуок судургутуллубут систиэмэтин (УСН) туһанааччылар нолуок төлүүр болдьохторун уларытыы туһунан этиллибит. Кини этэринэн, онно олоҕуран, УСН систиэмэтинэн нолуогу төлөөһүн алта ый уһаан биэрэр, маны тэҥэ 2022 сыл маҥнайгы кыбаарталын УСН авансанан төлөбүрүн болдьоҕо эмиэ уһуур.
Саҥа ирдэбилинэн, тэрилтэлэр нолуоктарын 2022 сыл алтынньы 31 күнүгэр диэри төлүөхтээхтэр (инники болдьох кулун тутар 31 күнүгэр диэри этэ). Урбаанньыттар нолуоктарын сэтинньи 30 күнүгэр диэри төлүөхтээхтэр (инники муус устар 30 күнүн иннинэ этэ). 2022 сыл маҥнайгы кыбаарталын иһин УСН авансанан төлөбүрүн болдьоҕо сэтинньи 30 күнэ буолла. Санатан эттэххэ, инники бу нолуок муус устар 25 күнүгэр түһэриллэр этэ .
Мунньах кыттыылаахтара бэлиэтээбиттэринэн, чэпчэтии сорох эрэ салааны хабар. Ол курдук, маһы таҥастааһыҥҥа, эми-тому, компьютернай уонна электроннай тэрили, авто-тырааныспары, электрическэй маллары, аһыыр бородууктаны, утаҕы, таҥаһы, кумааҕыны оҥорооччуларга, маны тэҥэ тэрилтэлэргэ: полиграфияны оҥорооччуларга, туризм уонна ыалдьытымсах буолуу салаата, доруобуйа харыстабыла, спорт уонна көрү-нары көҕүлээччилэргэ. Биэрэчиҥҥэ таҥастааһын эйгэтэ, култуура, спорт, доруобуйа харыстабыла, кэрэ индустрията уонна турагентстволар киирбиттэр.
Ил Түмэн урбааҥҥа, туризмҥа уонна инфрастуктура сайдыытыгар сис кэмитиэтэ, ырытыы түмүгэр, бу испииһэккэ бытархай атыынан дьарыктанааччылары уонна уопсастыбаннай аһылыгы тэрийээччилэри хабар туһунан этиилэрин СӨ Бырабыыталыстыбатын Бэрэссэдээтэлин аатыгар киллэрэргэ эттэ.
-
0
-
0
-
0
-
1
-
0
-
0
