Издательский дом Редакция Подписка
Погода в Якутске: . -20 oC

Бу олох соторутааҕыта П.А. Ойуунускай аатынан Саха академическай тыйаатырын сыанатыгар Москубатааҕы М.С. Щепкин аатынан Үрдүкү тыйаатыр училищетын (институтун) алтыс устуудьуйатын саҥардыы бүтэрбит эдэр артыыстар хас да сэргэх туруоруулара, саҥа сүүрээн буолан, кѳрѳѳччүлэр сүрэхтэрин сүүйдүлэр, номнуо бэйэлэрин сүгүрүйээччилэрин буллулар.

Бу олох соторутааҕыта П.А. Ойуунускай аатынан Саха академическай тыйаатырын сыанатыгар Москубатааҕы М.С. Щепкин аатынан Үрдүкү тыйаатыр училищетын (институтун) алтыс устуудьуйатын саҥардыы бүтэрбит эдэр артыыстар хас да сэргэх туруоруулара, саҥа сүүрээн буолан, кѳрѳѳччүлэр сүрэхтэрин сүүйдүлэр, номнуо бэйэлэрин сүгүрүйээччилэрин буллулар.

САХА СИРИН 100 ТАЛААННАРА

Барыта 20 выпускник талан ылбыт үөрэх­тэрин бүтэрэн, төрөөбүт Сахаларын Сиригэр үлэлии, айа-тута кэллилэр, сорохтор бу күннэргэ араас тыйаатырдарга, ол иhигэр Дьокуускайга, Ньурбаҕа уо.д.а., сирдэргэ үлэлиир миэстэлэрин буллулар.

Арассыыйаҕа киэҥник биллэр М.С. Щеп­кин аатынан Үрдүкү тыйаатыр училищета (института) саха национальнай тыйаатыра сайдарыгар улахан ѳҥѳлѳѳҕүн билэбит. Ѳссѳ 1955 с. артыыс идэтин баhылыыр баҕалаах саха талааннаах ыччатын аан маҥнайгы бѳлѳҕүн арыйбыттара. Оттон быйыл хайыы үйэ алтыс устуудьуйа выпускниктара тыйаатыр ускуусту­батын дууhаларыгар иҥэринэн, артыыс буолар баҕаларын толорон, тѳрѳѳбүт сирдэригэр тиий­эн кэллилэр.

«Саха Сирин 100 талааннара» ѳрѳспүүбүлүкэ салааларыгар каадырдары сыал­лаах бэлэмниир бырайыак чэрчитинэн 2019 с. от ыйыгар улахан тургутууну, талыыны ааhан киирбит, оттон билигин щепкинецтэр ааттарын киэн тутта сүкпүт выпускниктар ортолоругар Дьокуускай, Нерюнгри куораттарын, Ѳлѳѳн, Кэбээйи, Мэҥэ Хаҥалас, Амма, Таатта, Уус Алдан, Нам, Горнай, Ньурба, Үөһээ Бүлүү уонна Сунтаар улуустарын оҕолоро бааллар. Түѳрт сыл устата кинилэр дойдубут тэбэр сүрэҕэр, култуура уонна ускуустуба муҥутуур сайдыбыт киинигэр, тыйаатыр артыыстарын бэлэмниир аатырбыт кыhаҕа уhуйуллан, үүнэн-сайдан кэ­лэн, саха тыйаатырын кэскилин уhансар дьон буоллулар.

3fbe9b26 be04 4395 88be 850c5d2264a5

АРТЫЫСТАР УОННА УҺУЙААЧЧЫЛАР

Куурус уус-уран салайааччыта Людмила Титова алтыс устуудьуйа выпускниктарын: «Кинилэр бэлэм идэтийбит артыыстар, репертуардара баай, гастролларга сылдьы­быт, бэстибээлгэ кыттыбыт уопуттаахтар. Артыыс маастарыстыбатын чочуйар дьары­ктартан ураты сыанаҕа хайдах хамсанары, вокалы, классическай, джазовай үҥкүүлэри уонна фехтованиены үѳрэппиттэрэ», — диэн бэлиэтээбитэ элбэҕи этэр.

Саха щепкинецтэрин алтыс кѳлүѳнэ­лэрэ айар талааннарын, дьоҕурдарын дьиҥ- чахчы туоhулуур бэйэлэрин дипломнай испэктээкиллэрин ѳрѳспүүбүлүкэ сүрүн тыйаатырын сыанатыгар дьон дьүүлүгэр таhаардылар. Бэс ыйын 23 күнүттэн бэс ыйын 28 күнүгэр диэри кинилэр «Сайыҥҥы түүҥҥэ түүл» («Сон в летнюю ночь»), «Сака­лаат саллаат» («Шоколадный солдатик»), «Гроза», «Дон Жуан или Каменный пир», «Улахан уол» («Старший сын») испэктээкил­лэри оонньоон кѳрдѳрдүлэр.

Бэс ыйын 23-30 күннэригэр, Арассыый­аҕа Педагог уонна уhуйааччы сылыгар анаммыт «Учуутал, эн аатыҥ иннигэр…» диэн Нуучча тыйаатырын оскуолатын күн­нэрэ М.С. Щепкин аатынан Үрдүкү тыйаатыр училищетын алтыс саха устуудьуйатын выпускниктара кыттыылаах бэрт таhым­наахтык бардылар. Үѳрэнээччилэрин ѳй­ѳѳн, Москубаттан Дьокуускайга кинилэр преподавателлэрэ: Арассыыйа норуодунай артыыhа, Арассыыйатааҕы судаарысты­баннай аччыгый тыйаатыр тутаах артыыhа Людмила Титова, Арассыыйа норуодунай ар­тыыhа, А.С. Пушкин аатынан Москубатааҕы драматическай тыйаатыр тутаах артыыhа Тамара Лякина, Моссэбиэт аатынан Моску­батааҕы тыйаатыр артыыhа Анна Гарнова уонна Башкортостан Ѳрѳспүүбүлүкэтин ускуустубатын үтүѳлээх диэйэтэлэ, бэрэ­пиэссэр Наталия Макарова кытыннылар.

aea77b93 9149 4334 be92 729b433cdd93

САЙЫҤҤЫ ТҮҮҤҤЭ ТҮҮЛ

От ыйын 3 күнүгэр кѳрѳѳччүлэр үгүс ах­сааннаах кѳрдѳhүүлэринэн, П.А. Ойуунускай аатынан Саха академическай тыйаатырыгар улуу Шекспир айымньытынан туруоруллубут «Сайыҥҥы түүҥҥэ түүл» испэктээги эдэр ар­тыыстар хат кѳрдѳрдүлэр. Дьэ, онно, эдэр са­аhы, тапталы арахпакка арыаллыыр олох үтүѳ уонна мѳкү кѳстүүлэрэ, курус уонна кѳрдѳѳх түгэннэрэ биир тыынынан оонньоннулар. Са­алаҕа толору мустубут дьону эмиэ да хомотон ыллылар, эмиэ да күллэрэн быара суох ыыт­тылар. Биир бэйэм кѳрѳ олорон, хараҕым уута тахсыар диэри, ѳтѳрүнэн күлбэтэхпин күллүм. Ол быыhыгар: «Хатыламмат, олус бэртээхэй туруоруу буолбут.

Аны маннык испэктээк хаттаан кѳстүбэтэ хомолтолоох эбит. «Арай хаhан эмит муста түhэн оонньоотохторуна, хайдах буолуой…», – диэн санаа кытта киирэн ылла. Онон, дьон мээнэҕэ бу испэктээги хат кѳрѳр санааҕа кэ­лбэтэхтэр эбит.

395ad57c eb87 4a42 bfc8 91721f0dba64

ШЕКСПИР АЙЫМНЬЫТА САХАЛЫЫ ТЫЫННАННА

Шекспир ѳлбѳт-сүппэт айымньытын сицилианскай уобарастара сахалыы тыын­нанан, саха тылынан саҥараллар, олоҥ­холоон, туойан, оhуохайдаан бараллар. Ол барыта дьикти, ураты. Саха ыччата ити уустук миксы – булкуллубут-тэккиллибит, түргэн тэтимнээх сюжеттары, бэйэ-бэйэлэригэр хатыспыт култууралары да диэххэ, уодаhын­наах уонна сэмэй, тиэрэ кэмэлдьилээх уонна нарынтан-нарын, курус уонна тиэхэлээх пер­сонажтар хараахтырдарын арыйан, кыайа тутан оонньууллара сѳхтѳрѳр, үѳрдэр уонна кинилэр уhуйааччылара саха култууратын бэйэлэригэр чугастык ылыналларын, кини­эхэ ытыктабыллаахтык сыhыаннаhалларын туоhулуур. Режиссер-педагог Анна Гарнова: «Испэктээккэ национальнай колорит, саха но­руотун фольклора уонна үгэстэрэ иҥэрилли­биттэр. Бу сыанаҕа саха тыла эрэ иhиллэрин да иhин, буола турар барыта уобарастарынан кѳрдѳрүллэр буолан, хас биирдии кѳрѳѳччүгэ ѳйдѳнѳр. Тыл харгыhа сотуллан хаалар түбэлтэтэ. Кырасыабай, чаҕылхай, тапталынан, юморынан уонна эдэр саас омуннаах эрчи­минэн толору «Сайыҥҥы түүҥҥэ түүл» испэк­тээк Шекспир айымньытыгар эрэ буолбакка, саха култууратыгар кыттыhар кыаҕы биэрэр», – диэн этэрэ оруннаах.

САҤА ТАЛААННАР, САҤА ААТТАР

Эльфтар ыраахтааҕыларын Оберону Уйгу Семенов, кини сарыыссатын Тита­нияны Сандаара Федотова, Пэк диэн үтүѳ санаалаах иччини Нарыйа Колесова, Афи­ны герцогын Тезейы Афанасий Домотов, амазонкалар сарыыссаларын Александра Михайлова, Гермияны Анастасия Иванова, кини тапталлааҕын Лизандры Василий Романов, Еленаны Алена Пономарева, кини тапталлааҕын Деметрийы Евгений Григорьев, Эгейы Александр Захаров олус табыллан оонньоотулар. Оттон болуотун­ньук, столяр, таҥас ѳрѳѳччү, алтан иhити оҥорооччу уонна маастар оруолларын то­лорбут уолаттар – Ньургун Никитин, Мичил Хомподоев, Иван Кузьмин, Григорий Иванов, Александр Эверстов кэмиэдьийэ жанрыгар дьоҕурдаахтара арылхайдык кѳhүннэ.

Испэктээк түмүгэр эдэр артыыстары кѳрѳѳччүлэр ѳр да ѳр сыанаттан ыыппакка, ытыс тыаhынан, «биис» хаhыынан уруйдаа­тылар, сибэкки дьѳрбѳлѳрүн туттардылар, бэл, ийэлии сыллаан ыллылар. Сахабыт Сирин тыйаатырдарыгар саҥа талааннар, саҥа ааттар кэлбиттэрин кѳрѳн итэҕэйэн, алгыс тылларын эттилэр, дьоллоох саҕала­аhыннары баҕардылар.


Бэлиэтээн эттэххэ

Саха тыйаатырын уус-уран салайааччыта Андрей Борисов этэринэн, быйылгы сайыҥҥы сезонтан «Тыйаатырга аныгы драматургия» диэн бырайыак үлэтин саҕалыыр. Бу бырайыак иитинэн, Саха тыйаатырыгар аныгы драматурдар айымньыларын туруораллар. Холобур, «Таптал сүппүт куората» испэктээк премьератын кэннэ от ыйыгар аатырбыт тириэньэр Дмитрий Коркин туһунан драматург Утум Захаров пьесатынан режиссер Сергей Потапов испэктээгэ сүрэхтэнэр.

Коркин туһунан «Коркин. Андаҕар» туруорууга СӨ Физическэй култуураҕа уонна успуорка министиэристибэтэ кытыста. Бары өттүнэн өйөбүл оҥордулар. Премьера от ыйын 14-16 күннэригэр ыытыллар. Аныгы драматургия бырайыага олус туһалаах. Режиссердар да артыыстар да үлэлииргэ бэлэмнэр. Үүнэр сайыҥҥы сезоҥҥа бырайыагы сайыннарар, салгыыр былааннаахтар.

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением