Кулун тутар 20 күннэригэр идэлээх күннэрин көрсө култуура үлэһиттэрин пуорум-сийиэһигэр өрөспүүбүлүкэ бары муннуктарыттан мустуохтара, норуот маастарын күнүгэр национальнай таҥастаах сэлэлии хаамыахтара. Кэбээйигэ от ыйын 4-6 күннэригэр Олоҥхо ыһыаҕар ыалдьыттар кэлиэхтэрэ. Бу улуустан үс норуот суруйааччылара Николай Лугинов, Владимир Федоров, Андрей Кривошапкин тахсыбыттара.
Олоҥхо ыһыаҕар бэлэмнэнии үлэтэ номнуо бара турар, кылаабынай режиссер Руслан Тараховскай бары нэһилиэктэри кытыннарыахтаах. Ону таһынан, Кэбээйи көмүс хатырыктаах быйаҥнаах күөллэринэн биллэр, саханы саха дэппит эмис собону мантан аҕалаллар, тэрээһини толкуйдуурга маны эмиэ болҕомтоҕо ылыахтара.
Сайын Арассыыйа худуоһунньуктара кэлэн ыһыахпытын, дьоруойдарбытын үйэ-саас тухары үйэтитэр курдук хартыына оҥорон хаалларыахтара. Түүр тыллаах урууларбытыгар Кыргыстааҥҥа Саха Сирин күннэрин, Казахстааҥҥа «Симэх» быыстапкатын ыытыахтара. Ити курдук култуура араас норуоттары сомоҕолуур сүдү күүстээх. Ол туһунан СӨ Култууратын уонна духуобунай сайдыытын миниистирэ Афанасий Ноев өрөспүүбүлүкэтээҕи Медиа-кииҥҥэ буолан ааспыт төгүрүк остуолга иһитиннэрдэ.
Хаартыска эрэдээксийэ архыыбыттан.
-
1
-
0
-
0
-
0
-
0
-
0
