Култуура

Кэнники сэттэ сыл иһигэр өрөспүүбүлүкэҕэ 62 култуура эбийиэгэ тутулунна, аҥаардас былырыын түөрт эбийиэк үлэҕэ киирдэ. Олохтоох тыйаатырдар 1223 испэктээги туруордулар, Опера уонна балет тыйаатырын үҥкүүһүттэрэ «Күлүмүрдүүр күндү таас» этно-балет иһин үс «Кыһыл көмүс мааска» наҕарааданы ыллылар.

Ааспыт сыл сүрүн тэрээһиннэрин санаан аастахха, Саха Өрөспүүбүлүкэтин Национальнай библиотекатын 100 сыллаах үбүлүөйүн иитинэн Дьокуускай куоракка норуоттар икки ардыларынааҕы IV библиографическай конгресска 15 тас дойду уонна Арассыыйа 85 эрэгийиэнин эспиэртэрэ муһуннулар.

Өрөспүүбүлүкэ библиотекардарын бастакы сийиэһигэр 200 дэлэгээт 2032 сылга диэри библиотека дьыалатын сайыннарыы стратегиятын дьүүллэспиттэрэ.

Казахстаан Астана куоратыгар “Сэлии муоһунан хоһуйуу” муоһунан кыһааччылар айымньыларын норуоттар икки ардыларынааҕы IХ бэстибээлигэр өрөспүүбүлүкэ тутаах тэрийээччи буолбута. Бэстибээл чэрчитинэн муостан кыһыллыбыт оҥоһуктар куонкурустара, быыстапка-дьаарбаҥкалар, семинардар ыытыллыбыттара. Онно Кытайтан, Казахстаантан, Кыргызстаантан уопсайа 100 киһи кыттыбыта.

Нерюнгрига үрдүк таһымнаахтык тэриллибит Олоҥхо ыһыаҕар 25 тыһыынча ыалдьыт сылдьыбыта, Ыһыах аһыллыытын уонна сабыллыытын сиэригэр-туомугар 1,5 тыһыынча киһи хабыллыбыта.

Арассыыйа 29 эрэгийиэниттэн 50 тыһыынчаттан тахса ыалдьыты түмпүт Дьокуускайга ыытыллыбыт ХХV федеральнай Сабантуй омуктар сомоҕолоһууларын, иллээх сыһыаннарын, дойдубут култуурата эгэлгэтин өссө төгүл бигэргэппитэ. Сабантуй сүнньүнэн сонуннары киэҥник тарҕатар национальнай ситими сайыннарыы боппуруостарыгар төгүрүк остуоллар, Татаардар киинэлэрин күннэрэ, Татарстаан ускуустубатын маастардарын кэнсиэрэ уонна успуорт национальнай көрүҥнэринэн күрэхтэһиилэр тэриллибиттэрэ.

Олоҥхону ЮНЕСКО киһи аймах тылынан айбыт эриэккэс айымньытын быһыытынан билиниитин 20 сылыгар анаммыт Олоҥхо XVI Декадата сэтинньигэ ыытыллыбыта. Ол чэрчитинэн өрөспүүбүлүкэ үрдүнэн 80 тахса тэрээһин ыытыллыбыта. Татарстааҥҥа “Олоҥхо – Евразия сүппэт ой дуораана” национальнай эпос сүрэхтэммитэ. Ил Дархан Айсен Николаев олоҥхону чөл хаалларарга уонна киэҥник тарҕатарга 2026 сылтан олоҥхо үһүс уон сылын биллэрбитэ.

Д.К. Сивцев-Суорун Омоллоон аатынан Опера уонна балет судаарыстыбаннай тыйаатыра “Бастыҥ испэктээк. Балет” түһүмэххэ “Күлүмүрдүүр күндү таас” этно-балеты туруоруу иһин “Көмүс мааска” Арассыыйа тыйаатырдарын ХХХI национальнай бириэмийэтигэр үс наҕарааданы ылбыта.

Өрөспүүбүлүкэ судаарыстыбаннай филармониятын симфоническай хора хордар Шанхайдааҕы норуоттар икки ардыларынааҕы V бэстибээллэригэр “Светскай муусука” түһүмэххэ уонна “Хор сүрэҕэ” куонкуруска көмүс дипломунан наҕараадаламмыта.

Хаартыска:  Ил Түмэн култуураҕа уонна сонуннары киэҥ эйгэҕэ тарҕатар ситимҥэ сис кэмититэт бэрэссэдээтэлин солбуйааччы Захар Никитин архыыбыттан.