- 2025 сылга 4 култуура эбийиэгин тутуута түмүктэннэ. "Дьиэ кэргэн" национальнай бырайыак иитинэн Мэҥэ Хаҥалас улууһун Аллараа Бэстээх бөһүөлэгэр култуура сайдыытын киинэ уонна Сунтаар улууһун Кириэстээх сэлиэнньэтигэр "Саргы түһүлгэтэ" социальнай-култуурунай киин – 1-кы түһүмэҕэ аһылынна.
"Мин Сахам сирэ XXI үйэҕэ" Өрөспүүбүлүкэтээҕи үтүө дьыала хамсааһынынан иитинэн Үөһээ Бүлүү улууһун Быракаан сэлиэнньэтигэр уонна Мэҥэ Хаҥалас улууһун Бөкө сэлиэнньэтигэр култуура уонна успуорт кииннэрэ үлэҕэ киирдилэр.
"Дьиэ кэргэн" национальнай бырайыак чэрчитинэн хас да култуура эбийиэгэр толору өрөмүөн оҥоһулунна:
- Абый улууһун Үрүҥ Хайа бөһүөлэгин "Оҕо ускуустубатын оскуолата" өрөмүөннэннэ.
- "Саха Өрөспүүбүлүкэтин Национальнай бибилитиэкэтин" 1-кы түһүмэҕин өрөмүөнэ ыытылынна, 2-с түһүмэҕэ 2026 сылга түмүктэниэ.
-Хаҥалас улууһун Покровскай куоратын "Саргы түһүлгэтэ" диэн култуура уонна норуот айымньытын киинэ 1-кы түһүмэҕэ оҥоһулунна, 2-с түһүмэҕэ 2026 сылга түмүктэниэ.
- П.А. Ойуунускай аатынан Саха Өрөспүүбүлүкэтин судаарыстыбаннаһын түмэлин өрөмүөнэ түмүктэниэхтээх.
Маны таһынан, өрөспүүбүлүкэ бүддьүөтүн суотугар 2025 сылга Емельян Ярославскай аатынан Хотугу норуоттар устуоруйаларын уонна култуураларын судаарыстыбаннай холбоһуктаах түмэлин Чөркөөхтөөҕү салаатыгар уонна П.А. Ойуунускай аатынан Саха судаарыстыбаннай литература түмэлин Ытык Күөллээҕи салаатыгар толору өрөмүөн ыытылынна.
Итиэннэ, 2025 сылга Үүнэр көлүөнэ тус сыаллаах пуондатын үбүнэн Алдан оройуонун Аллараа Кураанах бөһүөлэгин Оҕо ускуустубатын оскуолатыгар толору өрөмүөн оҥоһулунна.
Быйыл култуура сылыгар Тыа сирин култууратын дьиэлэрин боломуочуйаларыгар, ол эбэтэр, методикаларын уонна нормативтарын чопчулааһыҥҥа киэҥ хабааннаах үлэ былааннанар. Маны таһынан, саха култууратын үйэлээх баайын эбийиэктэрин судаарыстыбаннай харыстабылын тупсарыы туһунан дьаһал уонна өрөспүүбүлүкэҕэ киинэни оҥорууга судаарыстыбаннай өйөөһүн туһунан сокуон барыла оҥоһуллуоҕа.
Хаартыска: Ил Түмэн култуураҕа уонна сонуннары киэҥ эйгэҕэ тарҕатар ситимҥэ сис кэмититэт бэрэссэдээтэлин солбуйааччы Захар Никитин архыыбыттан.
-
0
-
0
-
0
-
0
-
0
-
0
