Былырыын бу бырагырааманан өрөспүүбүлүкэҕэ фортепианоҕа, үҥкүүгэ уонна муусукаҕа үөрэтэр 11 педагог сүүмэрдэнэн 11 улууска, ол иһигэр Аартыка алта улууһугар үлэлии барбыттара. Быйыл кинилэр ахсааннара хаҥатылынна, 27 киһи дуогабардаһан үлэлии барыахтара. Исписэлиистэр кулууптарга, уопсастыбаннай кииннэргэ, бибилэтиэкэлэргэ, муусука уонна ускуустуба оскуолаларыгар үлэлиэхтэрин сөп.
«Култуура земскэй үлэһитэ» бырагырааманан билигин Арассыыйа хайа баҕарар олохтооҕо «Госуслуги» нөҥүө сайаапкатын биэрэр кыахтанна", - диэн СӨ Култууратын уонна духуобунай сайдыытын миниистирэ Афанасий Ноев иһитиннэрбитэ. Бу бырагыраамаҕа кыттыан баҕалаах дьонтон сайаапкалары тохсунньу 12 күнүттэн муус устар 15 күнүгэр диэри ылаллар. Дьүүллүүр хамыыһыйа киирбит сайаапкалары муус устар 16 күнүттэн ыам ыйын 15 күнүгэр диэри тургутан көрөн, түмүк таһаарыаҕа.
Бырайыак сүрүн соруга — тыа сиригэр үлэлиир култуура эйгэтин исписэлиистэрин элбэтии. Кинилэр профильнай үөрэх кыһатын бүтэрбит эдэр киһи, эбэтэр идэлэринэн үлэлии сылдьар уопуттаах исписэлиис буолуохтарын сөп.
Хаартыска: Ил Түмэн култуураҕа уонна сонуннары киэҥ эйгэҕэ тарҕатар ситимҥэ сис кэмититэт бэрэссэдээтэлин солбуйааччы Захар Никитин архыыбыттан.
-
0
-
0
-
0
-
0
-
0
-
0
