Ол тэлгэһэни, дьиэ иһин-таһын, иһити-хомуоһу, аһы-үөлү өрө тардыныы эрэ диэтэххэ татым буолар. Бу өйдөбүллэр саха киһитэ барахсан аҕыс ый хамсаабатах хартыыналаах, тоҕус ый уларыйбат сиэрэй көстүүнү тулуйан, Сир Ийэ барахсан сириэдийэ чэлгийэргэ бэлэмнэнэр, сэргэхсийэ сөхсүнэр сырдык сыдьааннаах сааскы кэм сардаҥаларынан арыалланар кэрэ кэмин ааһан, сайыҥҥыга үктэнэр үлүмнэс үөрүүтүн ыйа.
Дьэ, маннык кэмҥэ сардаҥалаах санаа кыымынан сырдыыр сэбэрэнэн, тобуллаҕас толкуйунан, сатабылынан, сайаҕаһынан, аһыныгас, чараас дууһалаах дьоммут булбуттарын-талбыттарын, бултаабыттарын-алтаабыттарын чугас дьонноруттан саҕалаан, ыал дьону, ытык кырдьаҕастары кытта үллэстэр үөрүүлээх кэмэ. Бу үйэлэри уҥуордаабыт үтүө үгэспит сүүрбэ биирис үйэ эдэр ыччатыгар баарыттан ама ким сүрэҕэ долгуйуо, үөрүө суоҕай?!
- "Үлэ Кыһыл знамята" уордьаннаах оҕуруотчут Павлова Вера Петровна
Ол курдук, кэккэ сылларга Сахабыт киэҥ нэлэмэн иэнигэр баар нэһилиэктэрбитигэр Ньукуолун күн кус миинин иһэр үөрүүнү үгүс элбэх ытык дьоммутугар бэлэхтиир булчут, кусчут эркин курдук эрэллээх эр дьоммут туһунан элбэхтэ кэпсииллэр, көрдөрөллөр.
Биһиэхэ, Хатаска, эмиэ оннук дьонноохпут, уолаттардаахпыт, аҕалардаахпыт, эһээлэрдээхпит. Күн бүгүн сүүһүнэн ыал алаадьыны кытта кус миинин иһиэхтэрэ. Кустарын-хаастарын түҥэттибиттэриттэн үөрбүт Татариновтары, Яковлевы, Окороковы, Егоровы, Баишевтары, Поповтары, Васильевы, Тарабукиннары, Потаповтары уо.д.а. кытта Григорий Евсеев баар.
Григорий -- эдэр ыал аҕата, 7-с нүөмэрдээх спортивнай оскуола тириэньэрэ. Дьиҥ чахчы саха эр киһитэ. Дьарыктанар, дьарыктыыр көрүҥэ – мас тардыһыыта. Бу көрүҥҥэ ёбыыппастар былчыҥ, күүс-уох, күлүмэх түгэн эрэ наадаё диир дьону кытта олох сөпсөспөппүн. Бу көрүҥ өй-санаа, эт-хаан сайдыылара, ай-дьай диэбит курдук, тэҥ таһымҥа тиийдэҕинэ эрэ ситиһиигэ, кыайыыга тиэрдэр. Ол аата сиэрдээх буолуу, санааны сааһыланыы – наарданыы, ыраҥалаан-ыйдаҥардан көрүү күүһү-кыаҕы кытта бииргэ тыыныахтаах.
Оскуола саҕаттан олорор түөлбэтигэр (Баҕарах-1) биир саастыылаахтарын түмэн, мунньан, бэйэлэрэ оҥостубут араас тренажердарыгар дьарыктыыра. Мин ону олох илэ харахпынан көрбүтүм, сэҥээрбитим уонна испэр наһаа астына санаабытым. "Эн оҕолору дьарыктаа" диэн ким да эппэтэҕин үрдүнэн, бэйэтэ баҕа санаатын күүһүнэн мунньар эбит этэ. Билигин санаатахха, киниэхэ үөрэтэр-такайар, эрчийэр диэн талаан айылҕаттан бэриллибит. Онтон анал үөрэҕи бүтэрэн үөрэппит, спорка тапталы иҥэрбит аҕа табаарыстарын кытта бииргэ үлэлиир чиэскэ тиксибитэ.
- Сүүһүн ааспыт Прокопьева Меланья Алексеевна
Дьэ, быйылгы да сылга 2022 сыл ыам ыйын 22 күнүгэр, Ньукуолун күн, Григорий Евсеев байанайын бэлэҕин – куһун сыа-сым курдук тутан, сэлиэйдээх кус миинин кини чугас дьонун, ьэлбэх ахсааннаах аймахтарын кытта нэһилиэкпит Бочуоттаах гражданина, 90 сааһын ааспыт Павлова Вера Петровна уонна 100 саас кирбиитин ылбыт Прокопьева Меланья Алексеевна бэйэлэрин дьиэ кэргэттэрин кытта иһиэхтэрэ.
Баҕарабыт ийэ тыл кэрэтэ, итиитэ, истиҥэ, иһирэҕэ иҥэн эппиппит эбиллиигэ, саҥарбыппыт саҥаҕа, кэпсээбиппит кэскиллээххэ буоларыгар!
Н.Руфова 22.05.22.
-
9
-
0
-
0
-
0
-
0
-
0
