Издательский дом Редакция Подписка
Погода в Якутске: . -14 oC

"Муусука -- барыбытыгар" диэн бырайыак үгүс элбэх үтүө дьону, саҥа ааттары таһаарда, муусука эйгэтин биллэрдик кэҥэттэ, тэниттэ.

"Муусука -- барыбытыгар" диэн бырайыак үгүс элбэх үтүө дьону, саҥа ааттары таһаарда, муусука эйгэтин биллэрдик кэҥэттэ, тэниттэ.

 Бу күннэргэ "Муусука -- барыбытыгар" бырайыак чэрчитинэн улахан, киэҥ далааһыннаах, дириҥ силистээх-мутуктаах тэрээһиннэр ыытылыннылар.

Үлэ түмүгүнэн күннэри-түүннэри үлэлээбиттэр, үрдүк көрдөрүүлээхтэр, таһымнаах үлэлээхтэр, сайдыбыттар-үүммүттэр, сайыннарбыттар-үүннэрбиттэр дьоһун аакка-суолга тигистилэр, үлэлиир сирдэрин, кэлэктииптэрин дорҕоонноохтук ааттаттылар.

Үөрүөхпүт туһугар, ол дьон иһигэр биир дойдулаахпыт, учууталбыт Полина Петровна Федорова (Колочёва) аата баар! Киниэхэ СӨ ҮТҮӨЛЭЭХ УЧУУТАЛА дорҕоонноох уонна бочуоттаах ааты иҥэрдилэр!

adb73777 8eee 49f8 93d4 1cc774d4ab98

Полина Петровнаны кытта төлөпүөнүнэн сибээстэстим.

- Үтүө күнүнэн, Полина Петровна. Бастатан туран, улахан эҕэрдэ! Дьэ, уонна, баһаалыста, туох, хаһан, ханна диэн кэпсээн ааһарыҥ буоллар. 

- Үрүҥ Хайа орто оскуолатыгар муусука учууталынан үлэлиибин. Ырыа эйгэтигэр бастакы хардыыларбын Хатастааҕы музыкальнай оскуолаҕа оҥорбутум. Онно учууталларбар барыларыгар махталым муҥура суох, ордук чуолаан Дарья Иннокентьевнаҕа. Музучилищеҕа Анаида Николаевна Туласынова, онтон өссө кэлин МГПУ профессора Елена Владимировна Николаева мин бүгүҥҥү, билиҥҥи турукпун чочуйан, үөрэтэн, ылыллыбыт кирбиилэрбин үрдэтэн испиттэрэ.

Орто оскуоланы бүтэрэн, олох киэҥ аартыгар үктэнэн, “Ханна? Хаһан? Тугу? Тоҕо?” диэн боппуруос буолбутугар, аҕам Петр Колочёв үтүө сүбэтинэн, уталытыллыбат этиитинэн М.Жирков аатынан Дьокуускайдааҕы музыкальнай училище дирижёрскай-хоровой отделениетыгар киирбитим уонна муусука умсугутуулаах, уйан эйгэтин муоратыгар күн бүгүҥҥүгэ диэри сылдьабын. Хатастааҕы музыкальнай оскуолаҕа үлэлии сылдьан, Үрүҥ Хайаҕа барар хорсун санааны эдьиийим Ирина Петровна укпута. Ол санаабар, быһаарыныыбар, эдьиийим сүбэтигэр махтана саныыбын. 2018 с. “Муусука – барыбытыгар” саҕаланыаҕыттан үлэбэр даҕаны, тус бэйэм ис турукпар да улахан уларыйыылар тахсыбыттара. Бэйэм билиибэр-көрүүбэр, сатабыллаах эрэлим улааппыта.

 9 10

- Ээ, дьэ, кырдьыга да, киһи олоҕун устатын тухары араас кэрдиис, кэрчик кэмнэргэ сөптөөх туһаайыыны ыллаҕына, таба тайаннаҕына, үүнүү-сайдыы балысхан буолар эбит. Эн бастаан тиийэн баран, улахан дьоҥҥо вокальнай ансаамбыллаах этиҥ дии.

- Оннук. Салгыы үөрэнэн өссө дириҥээбитим, кыахпар эрэлим улааппыта.  Ол кэлэктиибим "Иэйии" диэн хор этэ. Үрүҥ Хайа нэһилиэгин ырыаны таптааччылара этэ. Репертуарбыт баһыйар үгүс өттө долганскайдар этэ. Долган ырыатын син дьоҥҥо тириэртим дии саныыбын. Тоҕо диэтэххэ, биирдии ыллааһын туһунан, онтон күргүөм ырыа-хор да буоллун, ансаамбыл да буоллун, дьэ, ол туһунан эйгэ. Онно аранжировката, куолаһынан араарыллыыта, о.д.а.

- Оскуолаҕа үлэҥ туһунан сэһэргээ эрэ.

- Оҕолорго анаан долган ырыаларын хомуурунньугун таһаартардым. Сыралаах, сындааһыннаах үлэ, ол эрэн инникилээх, үйэтитиилээх буоллаҕа. Бүтүн омук култууратын биир салаата диэн санаатахха, үчүгэй үлэ барда. Оҕолорум ситиһиилэрэ хор эрэ буолбакка, оркестр, флейтаҕа оонньооччулар ансаамбылларын салайабын. Бу ''Муусука -- барыбытыгар'' баар буолан, хааччыллыы баар, болҕомто баар, чуолкай сыаллаах-соруктаах үлэ барар. Биллэн туран, бу  соҕотох мин эрэ ситиһиим буолбатах, бу бүтүн кэлэктиип, нэһилиэк да диэхпин сөп буолуо, кыайыыта-ситиһиитэ. Төрөппүттэр өйөбүллэрэ эмиэ улахан суолталаах. Дириэктэрим Неустроева Суруяна Валерьевнаҕа махталым улахан.

***

Манна даҕатан эттэххэ, Полина Петровна бииргэ төрөөбүттэрэ култуураҕа, кэрэ эйгэтигэр сүрдээх сыһыамахтар, ситиһиилээхтэр. Афанасий Колочёв үҥкүүлүүр, үҥкүүлэтэр, артыыстыыр, cериалга уһуллубута, логопед идэтин толору баһылаата. Дьоҥҥо-сэргэҕэ көмөтө үгүс. Анатолий Колочёв ырыа ымыылаах, айа-тута сылдьар киһибит буолар.

Полина Петровна 16 сылын ырыа туонатыгар сылдьар “Сайдам” вокальнай кэлэктиип маҥнайгы хардыыларыгар эмиэ өҥөлөөх. Бастакы ырыаларбытын кини үөрэппитэ.

Түмүкпэр Полина Петровнаны үрдүк наҕараадатынан өссө төгүл эҕэрдэлиэҕиҥ, өссө да сайдыыны-үүнүүнү баҕарыаҕыҥ!

Н.Руфова. Хатас. От ыйа. 2022 сыл

  • 1
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
Уопсастыба

Аартыка күнүнэн!

Бүгүн, кулун тутар 19 күнүгэр, Саха Өрөспүүбүлүкэтигэр Аартыка күнэ. Ил Түмэн аатыттан…
19.03.24 11:57