Ол туһунан лааҕыр иитиллээччитэ XI кылаас үөрэнээччитэ Гея Винокурова маннык кэпсиир:
--Лааҕырбыт аата «Кэнчээри». Манна араас кылаастартан уопсайа 24 оҕо сылдьабыт. Салайааччыбыт Кривошапкина Ньургуйаана Семеновна, саха тылын уонна литературатын учуутала.
Лааҕырбыт оскуола базатыгар тэриллэр. Оскуолабыт икки тэпилииссэтин, оҕуруотун көрөбүт-истэбит. Манна оҕурсу, помидор, биэрэс, кабачок, клубника, дьэдьэн үүннэрэбит. Оҕуруокка хортуоппуйу, моркуобу, сүбүөкүлэни уулатабыт, сыыс отун ыраастыыбыт. Быйыл сайыммыт олус тымныы, ардахтаах буолан, тэпилииссэбит үүнүүтэ бытаан.
Өссө лааҕырбытыгар эмтээх оту хомуйабыт. Ол курдук, ньээм от сибэккитин хомуйан, мүөт оҥорбуппут. Оҥорбут мүөппүтүн атыыга таһаарбыппыт. Салайааччыларбыт хайдах сууйан-сотон, мүөтү оҥорорго үөрэппиттэрэ. Маннык мүөтү былырыын лааҕырга эмиэ оҥорбуттара. Онон урут сылдьыбыт оҕолор үөрүйэхтэр, биһиэхэ сүбэ-ама буолаллар.
Мүөппүт олохтоох нэһилиэнньэҕэ атыыга тахсар. Былырыыҥҥыны, холобур, оскуолабыт үбүлүөйүгэр аналлаах тэрээһиннэргэ, быыстапкаҕа, агроскилска туһаммыппыт. Биһиги мүөппүт атыы мүөтүттэн амтанынан да, туһатынан да хаалсыбат.
Сотору кучу чэйи хаһаанарга, хатарарга бэлэмнэнэбит. Уйбаан-чэй биһиэхэ олус дэлэйдик үүнэр. Ону сэбирдэҕин чэйгэ, оттон сибэккитин барыанньаҕа, мүөккэ хомуйарга былааннаахпыт.
Иллэҥ кэммитигэр лааҕырга оонньуубут, араас тиэмэлээх кылгас киинэлэри көрөбүт. Лааҕырга сылдьарбытын олус сөбүлүүбүт.”
Ити курдук, оҕолор сайыҥҥы күннэрин лааҕырга атаараллар, элбэҕи билэллэр, көрөллөр, үөрэнэллэр.
Изабелла Ноговицына,
Орто Халыма, Өлөөк Күөл б.
-
1
-
0
-
0
-
0
-
0
-
0
