Билигин Турция биэс саамай ыарахан сыаналаах маассабай хайысхалар истэригэр киирэр. Турист бакыата бу дойдуга ортотунан 183 340 солк. турар. Холбоhуктаах Арабскай Эмираттарга уонна Египетка сынньанарга эмиэ балачча ороскуот эрэйиллэр.
Саамай чэпчэки сынньалаҥ Арассыыйаҕа буоларын экспертэр бэлиэтииллэр — 100 тыh. солк. иhинэн суумаҕа бириэмэни бэркэ атаарыахха сѳп.
Арассыыйа Кѳмүс боруоталарыгар, Кѳмүс эргимтэҕэ 3-5 күннээх маршруттар бааллар, орто сыаната биир киhиэхэ — 18-23 тыh. солк. Ол иhигэр аhааhын, отельга олоруу, экскурсия бырагыраамата уонна гид ѳҥѳлѳрѳ киирэллэр. Кѳмүс эргимтэҕэ Сергиев Посад, Переславль-Залесскай, Ростов Великий, Ярославль, Кострома, Иваново, Суздаль, Владимир уонна Углич куораттарынан айанныыгын.
Ону таhынан, Москва, Санкт-Петербург уонна Казань куораттар туристары ыҥыраллар. Холобур, Санкт-Петербурга 4 күннээх турмаршрут сыаната биир киhиэхэ ортотунан 25-27 тыh. солк. Туристар маннык сыаналаах бырагырааманан Эрмитаhы, Петродвореhы, аатырбыт храмнары уонна собуордары барыларын кѳрѳр кыахтаахтар.
Оттон Москваҕа сууккаҕа биир киhиэхэ 3 тыh. солк. түhэр гостиницалар элбэхтэр, оттон Казань отеллэригэр ѳссѳ онтон чэпчэки миэстэлэр бааллар.
Биллэн турар, саамай чэпчэки сынньалаҥы бэйэҥ эрэгийиэҥҥэр, тѳрѳѳбүт тѳрүт сиргэр атаарыаххын сѳп. Ханна да ыраах кѳппѳккѳ. Кэрэ айылҕалаах сирдэр, холобур, биhиги Сахабыт Сиригэр аҕыйаҕа суохтар, онуоха сынньалаҥы таба тэрийэр туристическай хайысхалаах аччыгый тэрилтэлэр эмиэ бааллар.
Аҕыйах күннээх турмаршруттарга дьон ордук наадыйар. Сыаната да чэпчэки, бириэмэҕин да сѳпкѳ аттараҕын.
Источник: «Парламентскай хаhыат».
Хаартыска аhаҕас источниктан ылылынна.
-
0
-
0
-
0
-
0
-
0
-
0
