Эргилин...
Издательский дом Редакция Подписка
Погода в Якутске: . -40 oC

“Эргилин” диэн киһини толкуйдатар ааттаах быыстапка Дьокуускай куорат Белинскэй уулуссатын 44-с дьиэтигэр баар “Арт-ситим” галерея-устуудьуйаҕа аһылынна.

“Эргилин” диэн киһини толкуйдатар ааттаах быыстапка Дьокуускай куорат Белинскэй уулуссатын 44-с дьиэтигэр баар “Арт-ситим” галерея-устуудьуйаҕа аһылынна.

         Ким барыта саҕаланар төрдүлээх, тирэҕирэр төрүттээх, төрөөбүт дойдулаах, төлкөлөөбүт норуоттаах. Онно хаһан эмэ син биир төннөр. Ол аата бэйэтигэр эргиллэр. Букатын да барбыттар үтүө өйдөбүл, ааспат ахтылҕан, кэрэ кэпсээн, хатыламмат хартыына буолан, бу олоххо эргиллэллэр...

         Сардаана Иванова уруһуйдарыгар эдэр сааһыгар суох буолбут кэргэнин мэтириэтэ кинилэр бииргэ олорбут дьоллоох кэмнэрин сэһэргииллэр, улахан тапталларын кэрэһилииллэр.

         Кини олоҕун аргыһа Ньургун Тимофеев, аата да этэринии, саха ньургун уола этэ. Ил Түмэн III, IV ыҥырыыларын дьокутаатынан талыллан, уустук кэмҥэ СӨ Судаарыстыбаннай Мунньаҕын Бэрэссэдээтэлинэн көдьүүстээхтик үлэлээбитэ, Саха Сиригэр алмаас бырамыысыланнаһа, ювелирнай салаа сайдыытыгар сүҥкэн кылаатын киллэрбитэ, уларыйыы кэмин интеллигенциятын чаҕылхай бэрэстэбиитэлэ этэ.

KVA 8843

         Ханнык баҕарар ситиһиилээх эр киһи кэннигэр мындыр кэргэн турар буолар. Сардаана Иванова эмиэ бэйэтэ эмиэ талаан-дьоҕур бөҕөтө киһи эбээт. П.П. Романов аатынан художественнай училищеҕа П.А. Ласс мастарыскыайыгар уһуйуллубута, онтон кэлин 2016 сыллаахха  уйулҕа уонна ускуустуба дьүөрэлэһэр “интуитивная живопись” дэнэр ньымаларыгар Е. Губарьга үөрэммитэ.

--Кыра эрдэхпиттэн дьон мөссүөнүн ойуулуурбун сөбүлүүбүн. Табаарыстарбын, дьүөгэлэрбин мэтириэттэрин уруһуйдаан, бэйэлэригэр биэрэри.  Киһи сирэйин-хараҕын, быһыытын-таһаатын дьүһүйэр бэйэтэ туспа турук. Тоҕо диэтэххэ, көрүүтүгэр, туттарыгар-хаптарыгар кини ис эйгэтэ, майгыта-сигилитэ, олоҕун сиэрэ – барыта ырылыччы көстөр, — диэн сэмэйдик кэпсиир.

KVA 8845

Сардаана Иванова быйыл 50 сааһын туоларынан, Москубаттан 28 хартыынатын уонна дьиэ кэргэнин сэдэх хаартыскаларын аҕалан, көрдөрүүгэ туруорда. Балаҕан ыйын 20 күнүгэр диэри ону үөһэ ыйыллыбыт аадырыска баран көрүөххүтүн сөп.

         Судаарыстыбаннай диэйэтэл Ньургун Тимофеев олоҕун аргыһа Сардаана Иванова айар быыстапкатын аһыллыытыгар Ил Түмэн вице-спикерэ Антонина Григорьева тиийэн эҕэрдэлээтэ.

KVA 8914 1

--Айар дьоҕуруҥ толору арыллан, өссө да элбэх хартыыналары суруйан, сүгүрүйээччилэриҥ элбии турдуннар! Быыстапкаҕар элбэх киһи сылдьан, айымньыларыҥ дириҥ ис хоһооннорун өйдөөн, кэрэҕэ талаһыыра, олоҕу сыаналыыллара мантан күүһүрэн бардын. Хартыыналарыҥ эрэ буолбакка, тус олоҕуҥ эмиэ дьэрэкээн кыраасканан киэркэйдин!

KVA 8841

Сардаана Иванова СӨ худуоһунньуктарын сойууһугар киирэр баҕа санаалааҕын эттэ. Кини бу Сойуус бэрэссэдээтэлэ Ольга Скориковаҕа уонна Ил Түмэн Бэрэссэдээтэлэ Алексей Еремеевкэ өйөбүллэрин иһин махтанарын биллэрдэ.

  • 11
  • 3
  • 0
  • 0
  • 1
  • 1

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением

Другие новости