Манна өй-санаа өркөнө, сатабыл бастыҥа, “биир киһи барыбыт, барыбыт биир киһи туһугар” диэн өйдөбүлүнэн бэйэ-бэйэҕэ тирэх буолан, Хатас тэрилтэлэрэ, нэһилиэк олохтоохторо, элбэх оҕолоох биир ыал курдук, эйэ дэмнээхтик алтыһаллар.
Ол курдук, ''Олоҥхо - олохпут ситимэ'' бырагыраама уонунан сылларга үлэтин чыпчаала буолан, сүдү киһибит Сергей Зверев-Кыыл Уола суруйан хаалларбыт ''Кулун кугас аттаах Куллустай Бэргэн'' олоҥхотун туруорууга холонон, күүспүтүн-уохпутун, кыахпытын түмэн, айар аартык суолунан айаннатан иһэбит. Манна хас биирдии тэрилтэ тус туһунан сыаллаах-соруктаах, үлэлээх: ким көстүүмнэри бэлэмнэһэр, ким декорация оҥорсор, ким бутафория өттүгэр үлэлэһэр, ким уопсай маассабай сыаналарга кыттыһар, ким сүрүн оруолларга оонньуур уо.д.а.
Бу хамсааһын суолтата улаханын, силиһэ-мутуга дириҥин учуоттаан туран, уопсай бииргэ үлэлээһиҥҥэ анал докумуоҥҥа дьаһалта баһылыга Е.П. Пермяков уонна ''Тускул'' КК салайааччыта В.А. Чепалов илии баттаатылар.
Олоҥхону туруоруу үп-харчы өттүнэн өйөөһүнэ Дьокуускай куорат дьаһалтатын өттүттэн “Норуодунай бүддьүөт” диэн анал бырагырааматын чэрчитинэн буолар. Дьэ, манна, этэргэ дылы, суруллубукка олоҕуран, былааннаабыкка тирэҕирэн, солкуобайыгар тиийэ отчуоттаах, кэппиэйкэтигэр тиийэ эппиэтинэстээх буолуу ирдэнэр. Үлэ оннук бара турар. Олоҥхону туруорууга бастакы холонуу буоларын быһыытынан, боппуруостар элбэхтэр, мунаахсыйыы да баар буолан ылар, долгуйуута биир оччо, эппиэтинэһэ өссө үрдүк. Ол да буоллар, бар дьоммутугар эрэлбит улахан, ылсыбыппытын ыпсарарга санаабыт ыллыктаах, туппуппутун ыһыктыбакка, сыалбыт-сорукпут туолуутун туһугар үлэбит күөстүү оргуйар.
Күн бүгүн, күнү көтүппэккэ, репетициялар буолаллар, көстүүмнэр хайдах буолаллара биллэр, бутафория оҥоһулла сылдьар, о.д.а. Бу түгэҥҥэ, бу кэмҥэ биһигини кытта бииргэ түбүгүрэ, хамсана-имсэнэ сылдьар Олоҥхо тыйаатырыгар (салайааччы М.Турантаева) махталбыт муҥура суох диэн санааны нэһилиэк аатыттан тиэрдэбит. Кинилэри кытта бииргэ буолуубут сылын аайы өрөспүүлүкэбит үрдүнэн ыытыллар олоҥхоҕо анаммыт тэрээһиннэр чэрчилэринэн уопсай былааҥҥа киириибит буолар. Ол туһунан анал докумуон -- былаан -- үрдүкү салалтанан (Култуура министиэристибэтэ) илии баттаммыта. Маны барытын ырытан, сүбэлэһэн, алтыннбы 13 күнүгэр тэрилтэлэрбит салайааччылара өссө төгүл чуолкайдаатылар, сыалы-соругу чопчулаатылар. Үлэ салгыы айанныыр...
Сыалбыт -- дьэҥкэ, сорукпут -- чуолкай. Самсоновтар ааттарынан оскуола (дириэктэр Н.В. Слепцов), ''Кэрэчээнэ'' оҕо уһуйаана (Г.С. Николаева), Дьокуускай куорат 7-с нүөмэрдээх спортивнай оскуолата (дир. Е.Е. Гоголев), Хатастааҕы оҕо искусствотын оскуолата (дир. Х.Н. Лемешева), Хатастааҕы ''Ситим'' айымньы дьиэтэ (дир. С.Т. Стручкова), Хатастааҕы 8-с нүөмэрдээх баһаарынай чаас (Н.Н. Гаврильев), Хатастааҕы сибиинньэ иитэр комплекс (дир. В.В. Романов), "Баҕарах" ХЭХ (дир. И.К. Сивцев), ''Прогресс'' ХЭТ (А.С. Пинигин), Хатастааҕы СТНГ (Н.Н. Васильев), Хатастааҕы балыыһа (М.Е. Брусенина) -- бары бииргэбит!
Наталья Руфова.
Хатас.алтынньы 2022.
-
1
-
0
-
0
-
0
-
0
-
0
