Бүлүүлэр "Сыгый Кырынаастыыр" премьераларын күн Суорун Омоллоон аатынан Опера уонна балет театрын саалатын көрөөччүлэр тобус-толору олорбуттара, кырдьыгынан эттэххэ, атын опера испэктээгэр маннык туолбутун элбэхтэ көрбөтөхпүт.
Бүлүү дьоно-сэргэтэ опера диэн искусство саамай үрдүк чыпчаалын боростуой көрөөччүгэ олох бэркэ тиэртилэр. Этэргэ дылы, күн бэҕэһээ трактор, массыына уруулун тута, от-мас үлэтигэр эриллэ сылдьааччы, оҕону иитиигэ, устудьуону үөрэтиигэ, о.д.а. норуот хаһаайыстыбатын араас салаатыгар үлэлээччи -- уус-уран самодеятельность дьоно, дьиҥ чахчы, норуот дьоно буоллаҕа дии, ол иһин, холобура, миэхэ быдан өйдөнүмтүө, чугас, сылаас, сырдык тыын кэлбитэ.
Кинилэр эмиэ да сахалыы сэмэйдик, эмиэ да айымньы ис хоһоонунуу хоһууннук, сороҕор баламат, харса суох майгыны толору биэрбиттэрэ. Уустук сыал-сорук дии саныыбын. Опера опера курдук, 4-5, 3-4 киһи тэҥҥэ бэйэлэрин партияларын (ырыаларын тыла тус-туһунан) тэҥҥэ түһэрэн ыллыылларыгар да өйдөнүмтүө.
Эдэр ыччат бөҕө хабыллыбыт, ырыа, тойук, үҥкүү, доҕуһуол күргүөмүнэн барыта баар. Өссө биири тоһоҕолоон этиэхпин баҕарабын – артыыстарга айымньыны көрөөччүгэ тиэрдэргэ сүрүн оруол дуу, ойоҕос оруол дуу, «массовка» дуу диэн өйдөбүл суоҕун олох үчүгэйдик өйдөппүттэр. Сценаҕа биир да мээнэ туран хаалбыт артыыс суох. Бары буола турар быһыыга-майгыга кытталлар, сирэй-харах, туттуу-хаптыы ооньуута умнуллубакка, биир кэм оонньонор. Нууччалыы эттэххэ – «высший пилотаж»!
Сыгый Кырынаастыырга биир сүрүн суолтаны музыка ылар. Музыка санааны сааһылыыр, бииртэн биир көстүүгэ бэлэмниир, долгутар, уоскутар, күүркэтэр. Эмиэ да эдэр дьон иэйиилэригэр олордон, былыта суох ыраас халлааҥҥа көтүтүөхтүү дайар, эмиэ да сиэрэ суох быһыыттан-майгыттан кэлэтэрдии, сүр күүскэ, сэниэлээхтик илгиэлиир.
Оркестр дирижёра артыыстары уонна музыканнары кытта тэҥҥэ биир тэтимҥэ, биир тыыҥҥа киирэн, бу икки бэйэ-бэйэлэрин көрбөккө алтыһар эйгэни биир уобарас оҥорорун илэ көрөн сөхтүм. Артыыстар олох кинини кытта быстыспат көстүбэт ситимнэрэ хара саҕаланыаҕыттан бүтэһик нота оонньонуор диэри быстыбата. Ону биир киһи тутар!
Опера бүппүтүн кэннэ, бокулуоҥҥа тахсыыга ол олох чаҕылхайдык көһүннэ. Артыыстар дирижер Николай Петрову ытыс дохсун тыаһынан көрүстүлэр. Сүрүн геройдар олох кууһа сылдьаллар. Ама, онтон айар-тутар киһи сүрэҕэ төһө үөрбүтэ буолуой?! Мин санаабар, ити айартан-тутартан дьоллонор диир түгэн... Оркестрга Бүлүү оркестра оонньосто. Төһөлөөх астык маастар-кылаас ылбыттара буолуой?!
Дьэ, ити курдук ол киэһэ, этэргэ дылы, саха буоларбынан киэн туттан, түөһүм мөтөйөн, хараҕым умайан, сүрэҕим өрүкүйэн тахсыбытым. Дойду тэбэр сүрэҕэр Москуба куоракка да сэргиэхтэрэ диэн эрэллээхпин.
Маннык улахан бырайыагы өй-санаа, эт-хаан, үп-харчы, тэрээһин өттүнэн уйбут Бүлүү улууһун салалтата, дьоно–сэргэтэ хайҕал, махтал тылларын ылыахтарын ыллылар. Аны даҕаны Ийэ тыл, Ийэ өй икки ини-бии сүдү күүстэри дууһаларыгар, сүрэхтэригэр иҥэрэн, үрдүк чыпчаалларга тиийдиннэр диэн баҕа санаабын тиэрдэбин.
Наталия Руфова, көрөөччү-сэргээччи, СӨ култууратын туйгуна, “СӨ норуот айымньытын сайдыытыгар кылаатын иһин” бэлиэ хаһаайката.
Хатас
Эрэдээксийэттэн: "Ил Түмэн" хаһыат муус устар 29 күнүнээҕи нүөмэригэр "Сыгый Кырынаастыыр" опера туһунан суруналыыс суруйуутун ааҕаарыҥ.
-
5
-
1
-
0
-
0
-
0
-
0
