Саха Сиригэр булуллубут көмүс самородоктар, биллэр диэйэтэллэр уонна историческай түгэннэр ааттарын сүгэр алмаастар, улахан императорскай хоруона, скипетр уонна держава куоппуйалара -- күндү металлар уонна таастар судаарыстыбаннай пуондаларыттан Саха Сиригэр аан маҥнайгытын кэлэн турдулар.
Саха Сирин “кылаатын мунньар” сиригэр Гохран көһө сылдьар быыстапката, кырдьык, сиэдэрэй сэдэх бэлэх буолла. Манна турбут 90 экспонат Сахабыт Сирин историятын кытары ыкса ситимнээхтэр.
Үөрүүлээх тэрээһиҥҥэ Ил Дархан Айсен Николаев кыттыыны ылла. Кини бу түгэн Саха АССР 100 сылын чэрчитинэн ыытыллыбыта ураты суолталааҕын бэлиэтээтэ.
«Саха Сиригэр кыһыл көмүс, алмаас, үрүҥ көмүс, атын да сиртэн хостонор баай, дьолбутугар, элбэх. Ааспыт үйэ 20-с, 30-с сылларыгар, Аҕа дойду Улуу сэриитин кэмигэр, дойдубут атаҕар туруутугар ол баайбыт барыта төһүү күүс буолбута, онтон да кэлин дойдубут күүһүрэригэр сүрүн тирэхпит буолар», — диэтэ Айсен Николаев.
Кини РФ Үпкэ миниистир Антон Силуановка, Арассыыйа Гохранын салайааччыта Андрей Юриҥҥа быыстапка тэриллибитигэр махталын биллэрдэ.
Үөрүүлээх күн өссө биир бэлиэ сонуна -- көмүс самородокка “Саха Өрөспүүбүлүкэтэ 100 сыла” диэн ааты иҥэрдилэр, анал сэртипикээти туттардылар.
Андрей Юрин бэлиэтээбитинэн, маннык быыстапканы тэрийии боростуойа суох быһаарыы. Ол курдук, сорох экспонаттар Гохран да иһиттэн тахсаллара көҥүллэммэт. Онтон быыстапкаҕа турбут экспонаттар бу Саха Өрөспүүбүлүкэтин кытта быһаччы сибээстээхтэр. Биһиэхэ ханна да суох көмүстэр булуллубуттар. Маны тэҥэ XVIII үйэ бүтүүтэ, ХХ үйэ саҕаланыыта оҥоһуллубут ювелирнай оҥоһуктар болҕомтону тардыахтарын эттэ.
Быыстапка саамай күндү экспоната -- императорскай регалиялар. Бу экспонаттар Кириэмил истиэнэлэрин иһиттэн тахсаллара көҥүллэммэт. Гохран маастардара улахан императорскай хоруонаны, скипетр уонна державаны үтүктэн, тэбис-тэҥ гына оҥорбуттар. Олору быыстапкаҕа аҕалбыттар. Державаны 1054 бриллиант киэргэтэр.
Быыстапкаҕа бэлэмнэнии балтараа сыл ыытыллыбыт. Экпонаттары тиэйии уонна онтон да араас тэрийэр боппуруостары быһаарсыы бириэмэни ылбыт. Саха Сирин Гохранын салайааччыта Иван Кычкин бэлиэтээбитинэн, быыстапка “сокровищницаҕа” буолара мээнэҕэ буолбатах. Ол курдук манна куттала суох буолууга улахан болҕомто ууруллар, ирдэбиллэр барыта толору тутуһуллаллар.
Манна даҕатан эттэххэ, көһө сылдьар «Национальные сокровища России. Москва – Якутск. 2022» быыстапка Саха Сиригэр муус устар 27 күнүттэн ыам ыйын 18 күнүгэр диэри үлэлиэҕэ.
-
2
-
0
-
0
-
0
-
0
-
0
