Общество

Маннык чаҕылхай киһибитин сидьиҥ дьон өлөрө сыстылар. Ол туһунан сурах өрөспүүбүлүкэни биир гына тилийэ көппүтэ, онон быһылааны хос быһаара сатаабаппыт.

Ытыктабыллаах Анатолий Игнатьевиһы көмүскэһэн, үгүс киһи санаатын эттэ. Кэргэнэ Диана Васильевналыын, оҕолорун кытта көрсөн, түбэлтэ буолбут сирин көрөн, хайдах көмөлөһөргө уонна хаарыан киһибитин итинник алдьархайтан харыстыырга кэпсэттилэр. Олор ортолоругар биир бастакынан өйүүргэ туруммут дьокутааттар Елена Голомарева уонна Мария Христофорова бааллар.

Елена Голомарева, Ил Түмэн хотугу аҕыйах ахсааннаах төрүт омуктар боппуруостарыгар уонна Аартыка дьыалатыгар сис кэмитиэтин бэрэссэдээтэлэ:

-- Сиэргэ баппат олус абалаах быһыы буолбутугар саҥарбат буолар сатаммат! Дойдубут нацизмы утары охсуһар, эр дьон Аҕа дойду иһин кыргыһар, Саха Сирин олохтоохторо бары гуманитарнай көмөҕө үп хомуйаллар, оттон бу “икки байыас” ойуурга 70 саастаах үлэ бэтэрээнигэр саба түспүттэрэ сүрүн! Эбиитин кинини буруйдаах курдук көрдөрө сатыыллар!

Мин 2008-2013 сылларга Саха Өрөспүүбүлүкэтигэр “Биир ньыгыл Арассыыйа”, онтон 2013 сылтан күн бүгүнүгэр диэри бу баартыйа Бэрэссэдээтэлэ Д.А. Медведев эрэгийиэннээҕи приемнайдарын салайан кэллим. Уонна маннык ынырык быһыы хаһан эмэ буолбутун өйдөөбөппүн, буолбатын даҕаны!

Быһылаан буолаатын кытта, приемнайбар Анатолий Игнатьевич Чомчоев кыыһа кэлэн, Кэҥкэмэҕэ буолбут түбэлтэни СМИ-гэ кырдьыктаахтык сырдаталларыгар көрдөстө.

Бу -- суукка быһаарыллар дьыала. Саха ыалын сиэринэн сэмэйдик, нус-бааччы олорбут ыалы итинник саалана-саалана аймыыллара өйгө баппат быһыы-майгы. Дьыала сөптөөхтүк быһаарыллыа диэн эрэнэбит. Туһааннаах тэрилтэ барыта онно үлэлиир. Кыыһын уоскуппутум. Уопсастыбаннас, Ил Түмэн дьокутааттара, өрөспүүбүлүкэ салалтата дьыаланы кэтии, көрө-истэ  сылдьыахпыт.

А.И. Чомчоевы патриот учуонай быһыытынан билинэбин. Аатырбыт сэбиэскэй учуонайдары кытта кини бүддьүөт үгүс харчытын кэмчилиэн сөптөөх атомнай кыра ыстаансыйа оҥкулун оҥорбута. Бу бырайыагы сэҥээрэр кэм кэлиэҕэ. Эколог, физик-ядерщик, дьиҥнээх патриот кырдьыгы туруорсууттан хаһан да туора турбатаҕа! Анатолий Игнатьевич үтүөрэрин баҕарыаҕыҥ!

Мария Христофорова, Ил Түмэн дьокутаата:

--Анатолий Чомчоев -- Арассыыйа үрдүнэн биллэр учуонай, полковник, Чернобыль дьоруойа, рак ыарыытын кыайбыт киһи, саха сүөһүтүн тэнитиини көҕүлээччи. Киниэхэ саба түспүт дьон сэби-сэбиргэли илдьэ сылдьары көҥүллүүр докумуоннаах эбиттэр. Үлэ массыынатынан икки буолан Чомчоевтар дьиэ кэргэттэрин бас билиилэригэр сылдьар сиргэ-уокка сокуоннайа суохтук киирбиттэр. Маннык түгэҥҥэ ханнык баҕарар киһи, Анатолий Игнатьевич курдук, бэйэтин олоҕун, баайын-дуолун көмүскүө этэ. Бу, кырдьык, өлөрөргө сорунуу. Биһигини харыстыахтаах, көмүскүөхтээх дьон ортотугар маннык сидьиҥ киһийдэхтэр бааллара хомотор. Маннык дьон судаарыстыбаннай уорганнарга да, уопсастыбабытыгар да көҥүл сылдьаллара табыллыбат.

Силиэстийэ сиэрдээх түмүгү таһааран, бу дьону уопсастыбаттан ыраатыннардахтарына эрэ, кырдьыгы ситистибит диэхпит. Росгвардия өттүттэн бу быһылаан оруннаах сыанабыла баар буолуохтаах. Ити дьон Росгвардияҕа сыһыаннаахтара дакаастаммыт буоллаҕына, салалталара маны сирийэн көрөн, дьоҥҥо-сэргэҕэ хайдах баарынан быһааран биэриэхтээх.

Кырдьык туругурдун!

Любомир Михайлов, уопсастыбанньык, албакаат:

--Маннык ытыктанар киһини биһиги баай өрөспүүбүлүкэбит судаарыстыбаннай көрүүгэ-истиигэ ылыахтаах. Шлагбаум аттыгар харабыллаах будка туруоруохха. Бэрэсидьиэммитин, ытык дьоммутун харабыллыыллар дии? Оттон биһиги баар-суох киһибитин харыстыырга бүддьүөттэн үп көстүө суоҕа дуо? Мин Анатолий Игнатьевич Чомчоевы судаарыстыба көрүүгэ-истиигэ ыларын ирдиибин! Манна өлөрөргө сааныы баара чахчы. Өссө экспертиза түмүгүн күүтэбит. Түмүгэ күһүн тахсыаҕа. Ол кэннэ холуобунай дьыала ханнык ыстатыйанан тэриллэрэ биллиэҕэ.

Сулустаана Мыраан, уопсастыбанньык:

--Бэҕэһээ Анатолий Игнатьевиһы кытта төлөпүөнүнэн кэпсэппитим. Куолаһа ыраас эрээри, ыараханнык тыынара биллэр этэ. Тыҥатын быһаҕынан таарыйбыттар. Билигин киниэхэ моркуоп хааһытын эрэ биэрэллэр. Атын аһылык көҥүллэммэт. Туруга син бэттэх курдуга эрээри, кэргэнэ Диана Васильевна дьиэтигэр сибээһэ суох олороруттан наһаа долгуйар.

 Диана Васильевна мантан ханна көһөр кыаҕа суох. Онон, бастатан туран, территорияҕа сибээһи олохтуохтаахпыт. Былаас уорганнара, уопсастыбаннас, СМИ бу кыһалҕаҕа болҕомто ууруохтарын наада. Хаһаайыстыбата барыта манна баар. Аны туран, Любомир Михайлов тылыгар кыттыһан манна харабыл баар буолуохтаах диибин. Сибээһи уонна харабылы хааччыйыахха!

Чомчоевтар дьиэ кэргэттэрэ киэн туттар дьоммут буолаллар. Бу дьыаланы өрөспүүбүлүкэ Ил Дархана Айсен Сергеевич Николаев хонтуруолга ылыахтаах. Оттон Анатолий Игнатьевич аймахтара бу түбэлтэни дьоҥҥо-сэргэҕэ киэҥник биллэриэхтээхтэр.