Бу күн 4 олорор уопсай дьиэ, 5 тиэргэн, хочуолунай уонна спорт саалата ууга барбыттара. 25 олохтоох киһини көһөрбүттэрэ, ол иһигэр 16 оҕо. Маны тэҥэ 11 төбө сүөһүнү куттала суох үрдүк сиргэ таһаарбыттара.
Ыам ыйын 15 күнүгэр киэһэ 17.00 чааска Хаар Балаҕан үрэххэ уу таһыма 324 см тэҥнэспитэ, ол аата критическэй муҥутаан көрдөрүүнү 51 см куоһарбыт.
Кыбартаалынай хочуолунайга уу киирэн, сиртэн 42 см тахсыбыта. Элбэх кыбартыыралаах биир дьиэҕэ муоста үрдүнэн 33 см таһыйбыта. Өрт- Дьиикимдэ массыына суолун хайысхатыгар быһыт биир сиринэн быстыбыта. Электрическэй уот, төлөпүөн, мобильнай сибээс, интэриниэт тохтоло суох үчүгэйдик үлэлээбиттэрэ.
Ол күн Өрт нэһилиэгэр Саха Сирин быыһыыр сулууспата пилота суох көтөр аппарааттаах баран үлэлээбитэ. Хоромньуну ааҕар-суоттуур анал хамыыһыйа тэрилиннэ.
СӨ Бырабыыталыстыбатын бэрэссэдээтэлин маҥнайгы солбуйааччы Дмитрий Садовников дьаһалынан Солоҕон нэһилиэгэр олоххо-дьаһахха куттала суох буолуу судаарыстыбаннай кэмитиэтин бэрэссэдээтэлэ Дмитрий Лепчиков, экология миниистирин солбуйааччы Эдуард Пихтин бара сырыттылар.
Солоҕон нэһилиэгин баһылыга Алексей Захаровка суукканы толору дьуһуурустуба олохтуурга, уу таһымын бэлиэтииргэ, ууга барбыт эбийиэктэр докумуоннарын чуолкайдыырга сорудахтаатылар. Оройуон баһылыга Никита Андреев Бэрдьигэстээхтэн Солоҕоҥҥо диэри суураллыбыт муниципальнай суолу чөлүгэр түһэриигэ суот үлэтин ыытыа.
2023 сылга Хаар Балаҕан үрэх сүнньүн ыраастыырга, дириҥэтэргэ, көннөрөргө субвенция харчытынан көмө бэриллиэ.
Оттон ыам ыйын 17 күнүн 7 чаас 30 мүнүүтэтигэр олохтоох дьаһалта уу түһэн эрэрин үөрэ кэпсээтэ. Ол курдук, уу таһыма 2 м 56 см буолбут, оттон критическэй көрдөрүү – 2 м. 73 см.
-
1
-
0
-
0
-
0
-
0
-
0
