Күөрэлэлээх олохтоохторо иһэр уу боппуруоһун туруорсубуттара ыраатта. Хас да төгүл чугастааҕы күөллэргэ чинчийии үлэтэ ыытыллыбыта да табыллыбатаҕа. Ол кэмтэн, хас да сыл-хонук ааста. Ол эрэн, үлэ тохтооботоҕо.
Аҕыйах хонуктааҕыта сэлиэнньэттэн 3 биэрэстэлээх Кыалаах Эбэ үрдүгэр модульнай станцияны туруордулар. Сууккаҕа 50 куб ууну хачайдыыр. Саппааһа баар. Ыраастаммыт ууну уу баһар массыына нэһилиэнньэҕэ тарҕатыа.
– Итиччэ объемнаах уу нэһилиэнньэни толору хааччыйар. Хас да бырайыагы көрөн, ырыттыбыт. Бүтэһигэр бэйэтигэр ыраастыыр фильтрдардаах станцияҕа тохтоотубут. Үлэтигэр элбэх дьон кыттыста. Сүрүннээн «Гидросфера» ХЭТ (дириэктэр Алексей Федоров) уонна урбаанньыттар Михаил Портнягин, Валерий Соловьев ылсан үлэлэһэллэр. Уу олох төрдө буолар диэн мээнэҕэ эппэттэр. Дьоммут-сэргэбит, оҕолорбут чэгиэн, доруобай буолалларыгар сүрүн болҕомтобутун ууруохтаахпыт. Онно ити станциябыт олук ууруохтаах. Билигин да ситэриллэ илик үлэ элбэх. Барыта этэҥҥэ бардаҕына абыраныа этибит, – диэн баһылык Алексей Петров санаатын үллэһиннэ.
Вячеслав Алексеев
-
0
-
0
-
0
-
0
-
0
-
0
