Саха Өрөспүүбүлүкэтин Ил Дарханын 2021 с. ахсынньы 30 күнүнээҕи 2258-с №-дээх Ыйааҕар олоҕуран, 2022 сыл тохсунньу 1 күнүттэн 2022 сыл ахсынньы 31 күнүгэр диэри кэмҥэ күн сирин көрбүт оҕолор “Үйэ оҕолоро” диэн 100 тыһыынча солкуобайдаах сэртипикээти ылаллар. Оттон бу билиҥҥи саҥа ыйаахха олоҕуран, хапытаал суотуттан 30 000 солкуобайы уу харчынан ылар бырааптаналлар.
Маныаха Ил Түмэн дьиэ кэргэҥҥэ уонна оҕо аймах дьыалатыгар сис кэмитиэтин бэрэссэдээтэлэ Алена Атласова быһаарыы биэрдэ:
- Бырабыыталыстыбабыт уонна парламент бииргэ ситимнээхтик үлэлэспиттэрин түмүгэр бу Ыйаахха Ил Дархан Айсен Николаев илии баттаата. Бырайыагы олоххо киллэрии Саха Өрөспүүбүлүкэтин үбүлүөйүгэр уонна Ийэ сылыгар ураты суолтаны биэрэр. Саха Сирин олохтоохторо бу тус сыаллаах хапытаалы улаханнык биһирээтилэр.
Парламентарий этэринэн, бу хапытаал саҥа төрөөбүт оҕолоох ыалга судаарыстыба өттүттэн социальнай өйөбүл буолар. 2022 сыл ыам ыйын 1 күнүнээҕи дааннайынан, Саха Сиригэр 3465 оҕо күн сирин көрбүт. Кинилэр бары “Үйэ оҕолоро” хапытаалы ылар толору бырааптаахтар. Маныаха эрэгийиэн 2022 сыллааҕы бүддьүөтүттэн 400 мөл солкуобай көрүллүбүт. Дьокутааттар бүддьүөтү ылыналларыгар бу сууманы тута биир санаанан бигэргэппиттэрэ.
“Хапытаал харчытын дьиэ кэргэн кирэдьиит тэрилтэтигэр бырыһыаҥҥа уурарга, оҕо үөрэҕэр, үрдүк технологиялаах мэдиссиинискэй өҥөнөн туһанарыгар, доруобуйатын чөлүгэр түһэрэригэр, санаторнай-курортнай эмтэниигэ (ол иһигэр өрөспүүбүлүкэ таһыгар), эмп-томп ылынарыгар, дьиэ кэргэнинэн Арассыыйа иһигэр сынньана барарыгар, олорор усулуобуйаны тупсарыыга, дьиэ өрөмүөнүгэр, тимир көлөнү ылыыга, кэтэх хаһаайыстыбаны сайыннарыыга (ол иһигэр тыа хаһаайыстыбатын тиэхиньикэтин атыылаһыыга), оҕо олоҕун уонна доруобуйатын страхованиетыгар туттуон сөбө. Оттон билигин өссө уу харчынан 30 тыһ. солк. уһулар кыахтанна,” – диир Алена Николаевна.
Кини салайар кэмитиэтэ Саха Сиригэр Ийэ сылын былаанын торумнуурга “Дьиэ кэргэн оҕо төрөөтөҕүнэ ирдэнэр саамай наадалаах малларын (оронун, кэлээскэтин, таҥаһын) ыларыгар «Үйэ оҕолоро» хапытаал аҥаарын (50%-ын) туһаныаҕын сөп этэ” диэн этиини киллэрбитэ. Бу этии бастаан ылыллыбатаҕа, ол гынан баран, Ил Түмэҥҥэ Саха Сирин социальнай-экэнэмиичэскэй туругун хааччыйар миэрэлэри дьүүллэһии буолбутугар, Алена Атласова боппуруоһу өссө биирдэ иккистээн көтөхпүтэ.
«Өрөспүүбүлүкэ ийэ хапытаалыттан (“Үйэ оҕолорун” кытта бутуйумаҥ) 30 тыһыынчата элбэх оҕолоох ыаллары өйүүргэ барарын биһириибит. Бу сокуон бырайыагын оҥорор наада. Ийэ сылын былаана оҥоһулларыгар биһиги: “Үйэ оҕолоро” тус сыаллаах хапытаал сорох харчытын оҕоломмут дьиэ кэргэн эһээхэйигэр таҥа-сап, о.д.а. тээбирини ыларга туһаннын ээ. Өрөспүүбүлүкэ ийэ хапытаалыттан 30 тыһ. солк. уу харчынан биэрэллэрин курдук, “Үйэ оҕолоро” хапытаал сорох чааһын эмиэ саҥа төрөөбүт оҕолоох ыаллар ылаллара тоҕоостоох буолуо этэ. Экэниэмикэбит бүгүҥҥү балаһыанньатыгар бу миэрэ дьиэ кэргэни өйүүргэ сөптөөх быһаарыныы буолуо этэ», - диэн Алена Атласова Ил Түмэн салалтата, сис кэмитиэттэрин бэрэссэдээтэллэрэ, хамыыһыйата, дьокутааттара, итиэннэ СӨ Бырабыыталыстыбатын экэнэмиичэскэй блогун үлэһиттэрин кытта тэриллибит «Саха Өрөспүүбүлүкэтин социальнай-экэнэмиичэскэй бигэ туругун хааччыйар сыаллаах быстах кэмнээх эбии анал миэрэлэр тустарынан» диэн тиэмэлээх оробуочай көрсүһүүгэ эппитэ.
Түмүккэ Алена Атласова: “Бырабыыталыстыба уонна парламент биир санаанан сорунуулаахтык үлэлэспиттэрин түмүгэр бу дьаһал олоххо киирдэ”, -- диэн эттэ.
Бэлиэтээн эттэххэ, бу Ыйаах балаһыанньалара 2023 сыл бэс ыйын 1 күнүгэр диэри күүһүгэр сылдьыахтара.
“Үйэ оҕолоро” хапытаалтан биир кэмнээх харчыны ыларга сайабылыанньаны социальнай харалтатын управлениетыгар эбэтэр МФЦ, биитэр Саха Өрөспүүбүлүкэтин судаарыстыбаннай уонна муниципальнай өҥөлөрүн www.e-yakutia.ru порталын нөҥүө 2023 сыл кулун тутар 1 күнүгэр диэри биэрэҕит.
-
1
-
0
-
0
-
0
-
0
-
0
