Мунньаҕы Ил Түмэн социальнай бэлиитикэҕэ, үлэҕэ уонна дьарыктаах буолууга сис кэмитиэтин бэрэссэдээтэлэ Алена Атласова иилээн-саҕалаан ыытта.
Сүрүн дакылааттары баайга-дуолга, сир сыһыаннаһыыларыгар миниистир эбээһинэһин толорооччу Светлана Абузова, тутуу миниистирэ Виктор Романов, Дьокуускай куорат баһылыгын маҥнайгы солбуйааччыта Георгий Гаврильев туруордулар.
Мунньахха иһитиннэрбиттэринэн, сокуон олоххо киириэҕиттэн бу сыл саҕаланыар диэри босхо сир учаастагын ылыыга 34 тыһ. 564 элбэх оҕолоох ыал уочаракка турбут. Олохтоох бэйэни салайыныы уорганнарынан 15 тыһынчаттан тахса сир учаастага бэриллибит (уопсай иэнэ 1838,3 га). Маны сэргэ, уһаайба оннугар биир кэмнээх төлөбүрүнэн 5 тыһ. 331 гражданин туһаммыт. Өрөспүүбүлүкэтээҕи “Дьиэ кэргэн” ийэ хапытаалын икки бүк үрдэтиллибит төлөбүрүнэн 681 киһи туһаммыт. Бүгүҥҥү күҥҥэ уочаракка 13 тыһ. 535 дьиэ кэргэн турар.
Ааспыт 2025 сыл устата босхо уһаайбалары биэриигэ үлэ күүһүрдүллүбүт, 2020 сир учаастага бэриллибит (уопсай иэнэ 168,63).
Олохтоох бэйэни салайыныы уорганнара иһитиннэрэллэринэн, 2026 сылга 1881 сир учаастага оҥоһуллубут, өссө эбии 2777 оҥоһуллуо.
Мунньах кэмигэр этиллибитинэн, сүрүн кыһалҕанан сир учаастага тиийбэтэ буолар. Элбэх оҕолоох ыалларга көрүллэр сир учаастага тиийбэтэ сүрүннээн нэһилиэнньэлээх пууннар сирдэрэ суоҕуттан тахсар. Маныаха федеральнай бас билииттэн муниципальнайга көһөрүүгэ үлэ тиһиктээхтик барар.
Дьокуускайга Маҕанныыр, Намныыр, Бүлүүлүүр суолларынан уонна Тулагы Киллэм сэлиэнньэтигэр сири бэлэмнээһин үлэтэ ыытыллар. Сир учаастактара сайаапка биэрбит элбэх оҕолоох ыалларга уочарат бэрээдэгинэн бэриллиэхтэрэ.
Сир учаастага улууска эбэтэр куоракка биэстэн итэҕэһэ суох сыл устата олорор элбэх оҕолоох уонна бас билиилэригэр атын сир учаастактара суох ыалга көрүллэр. Бу өҥөнөн туһанарга дьиэ кэргэн ирдэнэр докумуоннары уонна сайабылыанньаны олохтоох дьаһалтаҕа тиксэриэхтээх.
Мунньах туһунан сиһилии “Ил Түмэн” хаһыат аныгыскы нүөмэригэр ааҕыҥ.
-
0
-
0
-
0
-
0
-
0
-
0
