Октябрьскай уулуссаҕа турар филиал сэбиэдиссэйэ Вероника Александровна Макарова кэпсииринэн, бары кыһыл хаалтыс баанан, знамя тутан, горн үрэн, барабаан охсон, пионер кэмнэрин санаан ыллылар.
Кыттааччылар үс бөлөххө арахсан, бэйэлэригэр аат толкуйдаан, “Өрүү бэлэм буол!” диэн андаҕардарын эттилэр. Пионерскай ырыалары толордулар, стройунан кэккэлээн хаамтылар.
Островскай уулууссаҕа турар филиал сэбиэдиссэйэ Людмила Ивановна Потапова кэпсииринэн, кинилэр Пионер күнүн сылын ахсын бэлиэтииллэр. Быйылгы уратыта – биэлсэр Спартак Слепцову пионер этэрээтигэр киллэрбиттэр.
--Уларыта тутуу, ырыынак кэмин оҕото буолан, пионердар этэрээттэригэр киирбэккэ хаалбыт. Онон пионерия диэн тугун билбэтэх. Биһиги, урукку кэм пионердара буолан, киниэхэ бу үтүө тэрилтэни сырдатаары, биллэрээри, этэрээккэ ыллыбыт. Андаҕар эттэ.
Өр сылларга пионердар дружиналарын сэбиэтин бэрэссэдээтэллээбит, кэлин баһаатайдаабыт Павлова Зинаида Евсеевна Москуба куораттан эҕэрдэлээтэ. Кини кулууппут чилиэнэ, дэгиттэр талааннаах норуот маастара.
Бары биир стройунан хааман киирэн рапортаатыбыт. Знамя тутан, барабаан доҕуһуоллаах тэрээһини ыыттыбыт. Пионердар бары билэр “Взвейтесь кострами” ырыаны хорунан толордубут.
Бу курдук пионер хамсааһына билигин даҕаны тыыннаах. Манна даҕатан эттэххэ, Сахабыт Сиригэр 1992 сыл ахсынньы 5 күнүгэр уобаластааҕы пионерия тэрилтэтин оннугар «Саха Өрөспүүбүлүкэтин оҕолорун уопсастыбаннай холбоһуктарын сойууһа» диэн саҥа тэрилтэ төрүттэммитэ. Ил Дархан Егор Борисов ыйааҕынан 2014 сылтан ахсынньы 5 күнүгэр Оҕо уопсастыбаннай хамсааһынын күнүн бэлиэтииллэр.
-
0
-
0
-
0
-
0
-
0
-
0
